Posedimi i armëve të zjarrit është shndërruar në një dukuri negative, pasi që përpos që është e kundërligjshme, po cenohet edhe siguria e qytetarëve. Policia vazhdimisht gjatë kontrolleve has në persona që posedojnë armë.
Një rast i tillë është zbuluar dje në Prishtinë, ku Policia në koordinim me Prokurorinë kanë kryer bastisje në shtëpinë e një qytetari i cili u denoncua për armëmbajtje.
Burimet brenda Prokurorisë thonë se gjatë kontrollit në shtëpinë e 22-vjeçarit, janë gjetur dhe sekuestruar armë zjarri dhe të ftohta, si dhe fishekë të kalibrave të ndryshëm.
Pas bastisjes, i dyshuari është paraqitur në stacion policor, ku është intervistuar lidhur me rastin.
Prokurori i Shtetit ka urdhëruar që 22-vjeçari të ndalohet si i dyshuar për ‘Mbajtje në pronësi, kontroll ose posedim të paautorizuar të armës’.
Ndryshe, “Kushdo që mban në pronësi, kontrollon ose posedon armë në kundërshtim me ligjin e zbatueshëm lidhur me armë të tilla, dënohet me gjobë deri në shtatëmijë e pesëqind (7.500) Euro ose me burgim deri në pesë (5) vjet.“
