Gjysma e popullsisë së rritur të këtij globi gërhet, diçka që për ekspertët është më se normale.
Kur vjen puna tek fëmijët, gërhitja në disa raste mund të jetë shkak për shqetësim.
Shkaktarët e gërhitjes tek fëmijët
Një përllogaritje mesatare tregon se 1 në 10 fëmijë gërhet natën.
Një nga shkaqet kryesore të gërhitjes tek fëmijët ka të bëjë me akumulimin e tepërt të indeve në pjesën e fytit që luajnë një rol pengues.
Bajamet e mëdha ose mishi i huaj pengojnë frymëmarrjen e qetë dhe shkaktojnë gërhitje.
Probleme të tjera që shkaktojnë gërhitje janë:
Alergjitë,
Infeksionet e fytit,
Azma,
Kocka dhe kërci i devijuar i hundës,
Apnea e gjumit.
Kur bëhet shqetësuese gërhitja tek fëmijët
Prindërit duhet të shkojnë tek pediatri në rastet kur fëmija:
Gërhet shumicën e netëve të javës,
Gërhitja është shumë e shpeshtë gjatë natës,
Gërhitja është shumë e zhurmshme,
Fle me gojë hapur,
Has vështirësi në frymëmarrje gjatë gjumit.
Këto probleme mund të sinjalizojnë apnean e gjumin, një problem që ka të bëjë me vështirësinë në frymëmarrje që mund të ndërpresë gjumin e fëmijës rregullisht.
Ndërprerja e gjumit mund të shkaktojë plogështi, lodhje, probleme me përqendrimin dhe vëmendjen tek fëmijët.
Apnea nuk është shumë e përhapur tek fëmijët, por nëse ajo shfaqet mund të shkaktojë probleme serioze shëndetësore që prekin zemrën dhe mushkëritë.
Mbipesha dhe gërhitja
Mjekët shpjegojnë se fëmijët mbipeshë dhe ata që lindin parakohe janë më të predispozuar të gërhasin.
Gërhitja mund të jetë prevalente edhe tek fëmijët me Sindromën Down, ata të prekur nga çrregullimet neuromuskulare e të tjerë.
Trajtimet e nevojshme kundër gërhitjes
Trajtimet kundër gërhitjes mund të rekomandohen nga një pediatër.
Kur bëhet fjalë për mishin e huaj dhe bajamet, pediatri mund të rekomandojë një ndërhyrje kirurgjikale.
Nëse problemi qëndron tek mbipesha, pediatri mund të rekomandojë rënien nga pesha.
Nëse fëmija vuan nga apnea e gjumit, mjeku sërish mund të rekomandojë rënien nga pesha ose një ndërhyrje kirurgjikale.
Sapo problemi me apnean e gjumit të zgjidhet, në 90 për qind të rasteve, fëmijët nuk gërhasin më./AgroWeb.org
