Ish-komandanti i Forcave të Sigurisë së Kosovës (FSK), Kadri Kastrati, ka shprehur zhgënjimin e tij ndaj mungesës së veprimeve të presidentes së vendit, Vjosa Osmani, për sigurinë kombëtare dhe thirrjen e liderëve politikë në Këshillin e Sigurisë Kombëtare.
Ai ka fajësuar presidenten për situatën dhe kaosin në veri të Kosovës, duke e vënë atë si përgjegjëse kryesore për t’i marrë masat e nevojshme.
“Unë këtë situatë dhe këtë kaos të sigurisë që po ndodh në veri të Kosovës, unë ia bart barrën direkt te presidentja e vendit, sepse ajo është përgjegjësja kryesore që është dashur si presidente e vendit që të merret më këtë çështje”, ka deklaruar ai.
“Fillimisht dua të them se jam shumë i zhgënjyer që nga e premtja, dihet situata se si ka qenë dhe presidentja e vendit akoma nuk ka thirrur Këshillin e Sigurisë Kombëtare që është totalisht e papranueshme, nuk i ka thirrur liderët politikë. Ajo është në Moldavi, por mesa duket më interesant është të shkojë në inaugurime dhe ceremoni të ndryshme sesa siguria kombëtare. Sepse unë e shoh se siguria kombëtare është jashtëzakonisht e rrezikuar këtu, prandaj kam pritur që ajo të thërret liderët e partive opozitare, të thërret kryeministrin, të thërret Këshillin e Sigurisë Kombëtare, të ulet t’i dëgjojë të gjithë këta liderë, të marrë propozime. Ta thërret QUNIT-in që t’i njoftojë se çfarë ka biseduar me liderët politikë, edhe të sigurisë kombëtare dhe t’i drejtohet popullit sepse është presidente dhe është e para vendit”, ka deklaruar tutje ai.
