![](https://i0.wp.com/www.fiks.al/wp-content/uploads/2023/06/emisari-gjerman-huligane-nga-serbia-erdhen-per-te-protestuar-ne-kosove-pergjegjesi-kane-te-dyja-shtetet_647d659dd2321.jpeg?resize=850%2C567&ssl=1)
Emisari i Gjermanisë për Ballkanin Perëndimor, Manuel Sarrazin thotë se situatë në Kosovë edhe pse është e qetë për momentin, vazhdon të mbetet e paqëndrueshme.
Sipas tij, si Kosova ashtu edhe Serbia kanë humbur një pjesë të madhe të besimit dhe të dyja janë përgjegjëse për veprimet që i bëjnë.
“Fillimisht, më duhet të them atë që i thashë drejtpërdrejt kryeministrit Kurti: secili është përgjegjës për veprimet e veta. Natyrisht, presidenti serb Aleksander Vuçiq ka mbjellë mosbesim shtesë me deklaratat dhe sjelljen e tij votuese në Këshillin e Evropës javët e fundit. Megjithatë, vendimi i qeverisë së Kosovës për të rrezikuar këtë përshkallëzim duke i çuar kryetarët e komunave në objekte komunale me një përcjellje të fuqishme policore është një gabim për të cilin ajo mban përgjegjësi politike”, ka thënë Sarrazin për table.media.
I pyetur cila është përgjegjësia e Serbisë, Sarrazin ka përmendur “njerëzit që e ndanë mendjen për t’u përzier dhunshëm me demonstruesit”.
“Ka nga ata që e kishin ndarë mendjen, që u përzien dhunshëm me demonstruesit para objekteve komunale. Ata, natyrisht, mbajnë përgjegjësi për sulmet ndaj KFOR-it dhe policisë, sidomos ata që kryen krime të dhunshme. Nuk duhet të gënjejmë se këta ishin vetëm qytetarë të Mitrovicës së Veriut. Ata nuk ishin”, tha Sarrazin.
Sarrazin po ashtu ka pranuar që ka pasur huliganë të ardhur nga Serbia për të protestuar.
“Aty ka pasur huliganë, të cilët kanë ardhur edhe nga Serbia në veri të Kosovës, të cilët dinë saktësisht se si të veprojnë brutalisht kundër palës tjetër. Por duhet kujtuar gjithashtu se protestat paqësore që po i shohim prej disa ditësh janë përkrahur gjerësisht nga popullata serbe e Kosovës në veri. Sidomos në shoqërinë civile në Mitrovicën e Veriut, të cilët në asnjë mënyrë nuk i përkasin huliganëve thuajse profesionistë”, ka thënë Sarrazin.
Sipas tij dialogu duhet të vazhdojë sa më shpejt që të jetë e mundur.
“Një gjë është tashmë e qartë: dialogu i udhëhequr nga BE duhet të vazhdojë me shpejtësi të madhe. Ne e mbështesim plotësisht të dërguarin special të BE-së, Miroslav Lajçak. Për t’u larguar nga situata e vazhdueshme e krizës tani, zbatimi i marrëveshjes bazë midis dy vendeve, të rënë dakord në shkurt dhe mars, duhet të më në fund të ketë progres. Kancelari Scholz dhe presidenti Macron i mbështetën prerazi këto përpjekje për dialog në bisedimet e përbashkëta me krerët e shteteve nga Kosova dhe Serbia të mërkurën në Moldavi. Prioriteti këtu është kthimi në tryezën e bisedimeve, qetësimi i situatës në veri, vazhdimi i zgjedhjeve të reja në komunitete dhe zbatimi i marrëveshjes bazë“, tha Sarrazin.