![](https://i0.wp.com/www.fiks.al/wp-content/uploads/2023/06/cka-deklaroi-ne-prokurori-mesimdhenesi-qe-dyshohet-per-sulm-seksual-ndaj-te-mitures-ne-decan_648969fccc88a.png?resize=750%2C375&ssl=1)
Mësimdhënësi nga Deçani i cili po dyshohet për sulm seksual ndaj një të miture, e ka mohuar ta ketë kryer këtë vepër.
Një video-incizim i publikuar në media ditëve të fundit, tregon një moment ku mësimdhënësi shihet duke e puthur një nxënëse, vajzë e mitur.
Edhe kjo e fundit, sipas dosjes së prokurorisë të siguruar nga KALLXO.com, ka deklaruar në stacionin policor se i dyshuari V.S. e ka puthur në buzë atë dy herë, pa pëlqimin e saj.
Ndërsa i dyshuari, V.S. në deklaratën e tij e pranon që është mësimdhënës i viktimës, se ka qenë në dijeni të moshës së saj, por veprimet e tij kanë qenë vetëm duke e përkëdhelur dhe duke iu vendosur dorën në kokë dhe se i njëjti e ka afruar afër vetit për disa sekonda, tek faqja.
I dyshuari V.S, e ka mohuar sulmin seksual, por që sipas dosjes së prokurorisë, kjo është bërë me qëllim të ikjes nga përgjegjësia penale, ngase video-incizimi i kësaj ngjarjeje e vërteton të kundërtën.
Për këtë rast, Prokuroria themelore në Pejë ka bërë kërkesën për caktimin e masës së paraburgimit për mësimdhënësin në fjalë nën dyshimin se ai ka kryer dy vepra penale sulm seksual dhe kanosje.
Sipas dosjes së prokurorisë, i dyshuari V.S., dyshohet po ashtu se ka kanosur edhe personin apo dëshmitarin që e ka bërë video-incizimin e rastit në fjalë.