![](https://i0.wp.com/www.fiks.al/wp-content/uploads/2023/06/kpm-ja-vendos-per-rastin-klan-kosova_648c616180825.png?resize=626%2C375&ssl=1)
Komisioni i Pavarur i Mediave (KPM) ka vendosur t’i japë 30 ditë afat televizionit Klan Kosova për plotësimin e dokumentacionit të nevojshëm për mbajtjen e licencës së transmetimit.
Vendimi është miratuar në mbledhjen e KPM-së të mbajtur të premten.
Ky propozim u votua pro nga të gjithë anëtarët e bordit të Komisionit të pavarur të mediave.
Ndërsa, sipas rekomandimit të Zyrës Ligjore të KPM-së, në rast të dështimit për të vepruar në pajtim me rregullorën, atëherë Klan Kosova do të përballet me sanksione.
KPM-ja me dy propozime për Klan Kosovën
Kryetari i Komisionit të Pavarur të Mediave, Jeton Mehmeti, ka thënë se zyra ligjore e KPM-së ka dhënë dy rekomandime për sa i përket vendimit për pezullimin e certifikatës së biznesit të Klan Kosovës.
Mehmeti tha se dispozita e parë është Klan Kosova, në afat prej 30 ditëve obligohet ta plotësoj dokumentacionin e nevojshëm për mbajtjen e licencës.
“Duke marrë parasysh faktin se vendimi për pezullimin e certifkatës së biznesit Klan Kosova, vë në dilemë ligjshmërinë e regjistrimit të këtij biznesi, nga zyra ligjore e KPM-së kemi një rekomandim i cili ka dy dispozita”.
Ai tha se propozimi i parë është që në afat prej 30 ditësh nga pranimi i këtij vendimi ta plotësoj dokumentacionin e nevojshëm për mbajtjen e licencës.
“E para, obligohet ofruesi i shërbimit medial, Klan Kosova, që në afat prej 30 ditësh nga pranimi i këtij vendimi ta plotësoj dokumentacionin e nevojshëm për mbajtjen e licencës së transmetimit, konform rregullores për ofruesit e shërbimeve mediale të KPM-së të vitit 2021”.
Kurse nëse nuk përmbushet propozimi i parë, do të rezultojë me masa sanksionuese të përcaktuara me nenin 30 të ligjit të KPM-së.
“Dy, dështimi për të vepruar në pajtim me rregulloren për ofruesit e shërbimeve mediale, brenda afatit të përcaktuar do të rezultojë me masa sanksionuese të përcaktuara me nenin 30 të ligjit të KPM-së”, tha Mehmeti