Trupi i copëtuar i një futbollisti u zbulua të dielën në një lumë në shtetin jugperëndimor të Brazilit, Mato Grosso do Sul.
Hugo Skulny, 19 vjeç, ishte zhdukur që nga 25 qershori kur ai mori pjesë në një festë me miqtë e tij, tha policia braziliane.
Ai u pa për herë të fundit kur një nga miqtë e tij e la pranë shtëpisë së ish të dashurës së tij në qytetin brazilian të Sete Quedas.
Shefja e Policisë Civile, Lucelia Constantino tha se pjesët e trupit të Skulny u gjetën në shtratin e lumit Iguatemi në Sete Quedas, një qytet që kufizohet me Paraguajin.
“Koka nuk u gjet, vetëm gjymtyrët dhe busti”, tha ajo.
Autoritetet ishin në gjendje të identifikonin Skulny për shkak të një tatuazhi të babait të tij, i cili ndërroi jetë dy vjet më parë.
Së paku një i dyshuar, emri i të cilit nuk bëhet i ditur nga policia, është arrestuar.
Të hënën, departamenti i zjarrfikësve rifilloi një kërkim në lumin Iguatemi për të gjetur kokën e futbollistit.
Eshtrat e tij u transferuan në qendrën e ekzaminimit mjekësor në Ponta Porã për kryerjen e autospsisë.
Skulny jetonte me gjyshen dhe vëllanë e tij nga nëna në Sete Quedas ishte pjesë e ekipit të komunës.
“Ata e gjetën të vdekur në lumin Iguatemi, e prenë”, tha nëna e tij Eliana Skulny, sipas Campo Grande News. “Sa mizori ka në botë, o Zoti im. Djali im ishte një djalë i mirë”, tha ajo.
