Të shtunën e kësaj jave, pritet që në Kosovë dhe Serbi të vijnë emisarë evropianë dhe amerikanë, në mënyrë që dy vendet t’i kthejnë në procesin e dialogut pas ngjarjeve në Bajnskë.
E meqë ndaj Serbisë ende nuk është marrë ndonjë masë ndëshkuese për këto ngjarje, njohësit e rrethanave politike konsiderojnë se vendi ynë nuk duhet të kthehet në dialog pa u ndëshkuar shteti serb.
Rreth një muaj pas rastit të Banjskës, përfaqësues evropianë e amerikanë pritet të zbarkojnë në Kosovë dhe Serbi.
Vizita e pesëshes së madhe, ka në fokus planin që palët t’i rikthejnë në procesin e dialogut drejt normalizimit të marrëdhënieve.
Megjithatë, njohësi i çështjeve politike, Shkodra Ramadani thotë se Kosova nuk duhet t’iu kthehet negociatave, nëse nuk ka masa ndëshkuese ndaj Serbisë, pas ngjarjeve të 24 shtatorit.
“Bashkësia ndërkombëtare ka dërgu një sinjal krejt tjetër, duke kërkuar që të rikthehet dialogu aty ku e kanë lënë palët para se të ndodhin ngjarjet në veri………Kosovës i mbetet që të kërkojë sanksione tek vendet anëtare veç e veç në mënyrë që ato ta sanksionojnë secila, veç e veç Serbinë”, tha njohësi i çështjeve politike, Shkodran Ramadani.
Teksa shton se edhe ndryshimet e vogla që ata mund t’i sjellin, Kosova nuk duhet t’i pranojë.
“Nuk pres ndonjë ndryshim radikal, substancial nga ardhja e pesëshes së madhe. Pres që përafërsisht të jetë e njëjta siç ka qenë para sulmit në Banjskë, ndoshta me ndryshime të vogla kozmetike por që Kosova nuk duhet ti pranojë”, u shpreh Ramadani.
Ndërkohë, njohësi i rrethanave politike Tomorr Avdija konsideron se të dërguarit evropianë dhe amerikanë do të përçojnë presion më të madh te pala serbe, për tu rikthyer në dialog.
“Përveç se vijnë duke u shtuar për të rrit presionin në dy palët, mendoj se do të ketë presion më të madh drejt palës serbe dhe presidentit Vuçiq, për arsye se ajo është pala që ka nxjerr gjithçka nga kontrolli dhe tenton ta destabliziojë jo vetëm veriun, por gjithë rajonin”, theksoi njohësi i çështjeve politike, Tomorr Avdija.
Pesëshja e emisarëve përfshinë, të dërguarin e BE-së, Mirosllav Lajçak, atë të Uashingtonit për Ballkanin Perëndimor, Gabriel Escobar, të dërguarin e Francës, Emmanuel Bonn, atë të Gjermanisë, Jens Plotner, dhe të Italisë, Francesco Talo.
Ata pritet të vijnë në dy shtetet ballkanike më 21 tetor
