Deputeti i Partisë Demokratike të Kosovës, Enver Hoxhaj, ka thënë se kjo javë është fatale për vendin dhe me pasoja kolosale për të ardhmen.
Përmes një reagimi në rrjetin social Facebook, nënkryetari i Kuvendit, Enver Hoxhaj, ka deklaruar se është pranuar Asociacioni që tashmë është autonomi.
“Kjo është javë fatale për Kosovën dhe me pasoja kolosale për të ardhmen! U pranua Asociacioni që tashmë është autonomi, u pranua pa njohje të ndërsjellë, pa anëtarësim në NATO dhe OKB, dhe 24 shtatori, si akt agresioni, kaloi si një ngjarje pa asnjë rëndësi dhe nuk solli asnjë përfitim për Kosovën dhe asnjë sanksion për Serbinë”, ka shkruar Hoxhaj.
Sipas tij, është koha që Qeveria të marr përgjegjësi politike dhe të japë transparencë, duke publikuar çdo gjë çka është pranuar.
“Por, është koha gjithashtu që qytetarët të braktisin komplotet populiste dhe fantazitë e Albin Kurtit që Kosovën e betonoi në pafundësi në status-quo. Këtë javë u hoq dorë përfundimisht nga qëllimet për të realizuar idealet themeluese të Kosovës së pavarur dhe përmbylljen e shtetësisë së saj!”, ka përfunduar Hoxhaj.
