Deputetja nga radhët e Partisë Demokratike të Kosovës, Blerta Deliu- Kodra, duke folur për listën e zezë të ShBA-së, që u publikua para një jave, pjesë e së cilës është bërë edhe Nexhat Krasniqi, shef i departamentit të Prokurimit në Ministrinë e Infrastrukturës, tha se ky nuk është lajm i mirë për Kosovën.
Ajo deklaroi se me këtë veprim, SHBA e rikonfirmoi edhe njëherë seriozitetin për ta ndihmuar Kosovën në sundimin e ligjit.
“Ambasadori amerikan e rikonfirmoi edhe njëherë seriozitetin e trajtimit të kësaj çështjeje kaq të ndjeshme për Kosovën. E tha që SHBA po vazhdojnë të jenë aleatë të Kosovës në fuqizimin e sundimit të ligjit, shto këtu faktin që kemi një parti politike që është në pushtet e kauza kryesore e saj ka qenë lufta ndaj krimit të organizuar dhe korrupsionit, natyrisht që nuk është lajm i mirë për Kosovën”, ka thënë Deliu- Kodra, në emisionin “Kallxo Përnime”.
“Mbetet të shihet se cili do të jetë epilogu i gjithë këtyre ngjarjeve, të cilat kanë ndodhur, unë nuk e mbaj mend që ka pasur ndonjëherë ndonjë zyrtar të qeverisë të këtij profili në listën e zezë të Shteteve të Bashkuara të Amerikës”, ka thënë Deliu- Kodra.
Ndryshe më datën 3 të këtij muaji, Nexhat Krasniqi, shef i Prokurimit në Ministrinë e Infrastrukturës, ka hyrë në listën e të sanksionuarve të Departamentit Amerikan të Shtetit, duke iu ndaluar hyrja atij dhe dy fëmijëve të tij.
Nexhat Krasniqi me vendim të Departamentit Amerikan të Shtetit është sanksionuar si i “papërshtatshëm për hyrje në Shtetet e Bashkuara, për shkak të përfshirjes së tij në korrupsion të madh”- ndërlidhur me rastin e Parkut Industrial në Drenas.
