Qeveria britanike refuzoi të ndihmonte familjen për të kthyer trupin në Shqipëri
Mediat britanike i janë rikthyer rastit tragjik të humbjes së jetës në anijen hotel të emigrantit shqiptar Leonard Farruku më 12 dhjetor të vitit të shkuar.
BBC ka si titull “Familja e emigrantit nuk përballon dot sjelljen e trupit në atdhe”, teksa në shkrim citohet motra e Leonardit, e cila ka deklaruar se: “Vdekja e vëllait në të tilla rrethana ishte një tragjedi por ne tani jemi duke u përballur me një tragjedi të dytë nga pamundësia për ta sjellë trupin në Shqipëri dhe kryer ceremoninë funerale”.
“Ne nuk e dimë sa të zgjasë mbledhja e shumës së nevojshme për kthimin e trupit” citohet ajo nga BBC.
Për ta arritur këtë familja e 27-vjeçarit Leonard Farruku ka kërkuar ndihmën e kujtdo që mundet përmes faqes GoFound, ku synohet të mblidhen 10.000 stërlina për të mbuluar shpenzimet e sjellës së trupit të tij në Shqipëri.
Megjithëse Leonard Farruku i dha fund jetës në anijen-hotel e menaxhuar nga qeveria angleze, ministria e punëve të brendshme Home Office, refuzoi të ndihmojë financiarisht kthimin e trupit në Shqipëri.
Sekretari shtetit për çështjet e brendshme James Cleverly për vdekjen e Leonard Farrukut tha se do të “ketë një hetim të plotë”.
Disa ditë më parë në mediat britanike u publikua një vlerësim për politikën e akomodimit të emigrantëve në anijen hotel Bibby Stocholm ku theksohej se emigrantët përballeshin me diskriminime. Por ky raport vlerësimi u fshi nga faqja e Home Office me argumentin se ishte publikuar gabimisht.
