Kryeministri Albin Kurti u pyet në konferencën e sotme për media për ndalimin e futjes së mallrave serbe.
Kurti tha se “nuk ekziston asnjë masë tregtare me Serbinë”, por tha se “të gjitha këto janë në përputhje me situatën e sigurisë”.
“Sa i përket kushteve të sigurisë në Kosovës, sa i përket kufirit tonë me Serbinë, nuk janë ende të mira. Sa i përket asaj se çfarë malli lejohet të importohet apo çfarë vetura, Ministria e Punëve të Brendshme dhe Dogana është adresa e duhur”, tha Kurti.
“Nuk dëshirojmë të ketë diskriminim dhe nuk ekziston asnjë masë tregtare me Serbinë, por të gjitha këto janë në përputhje me situatën e sigurisë, e cila ne dëshirojmë që të përmirësohet dhe normalizohet”, tha ai.
Serbët janë ankuar se ka disa muaj që Qeveria e Kosovës e ka ndaluar futjen e mallrave serbe në vend.
Këtë veprim të Qeverisë e pati kundërshtuar Ambasada e SHBA-së në Kosovë. Një zëdhënës i Ambasadës pati thënë se meqenëse Kosova dhe Serbia përpiqen për integrim europian, duhet të ndërmarrin veprime “që promovojnë më tej qarkullimin e lirë të mallrave përtej kufijve të saj, jo veprime që e pengojnë atë”.
Kurti pati thënë se ky vendim për të cilin nuk ka pasur njoftim zyrtar, ishte marrë për arsye sigurie dhe jo ekonomike.
