Ende nuk janë shuar debatet , kritikat dhe deklaratat rreth sistemit kundërtank “Javelin” të porositur nga Kosova, që DASH e ka miratuar dhe pritet të kalojë edhe në Kongres për miratim përpara se të arrijë në Kosovë.
Por kjo po “dënohet” si veprim nga qarqet serbe edhe ruse.
Kështu zëdhënësja e ministrisë së jashtme ruse Zaharova ka deklaruar se “Rusia dënon planin e Uashingtonit për dërgimin e sistemin ‘Javelin’ Kosovës”, shkruan “Politika” transmeton “Bota Sot”.
“Moska dënon planin e Uashingtonit që të dërgoj Republikës së Kosovës sistemin kundërtank ‘Javelin’, sepse ajo minon procesin e bisedimeve mes palëve” ka deklaruar Zaharova.
Këtë deklaratë ajo e bëri në takimin e rregullt me gazetarë, ku nënvizoi se “Rusia dënon të gjitha përpjekjet për armatosjen e strukturave jo legjitime të Prishtinës”.
Gazeta “Politika” përkujton se më herët Departamenti i Shtetit amerikan ka miratuar lejen për shitjen e sistemit kundërtank “Javelin” Kosovës në vlerën prej 75 milionë dollarë, ka kumtuar Agjencia për bashkëpunim në fushën e sigurisë në Pentagon, që është përgjegjës për dorëzimin e teknikës ushtarake dhe armatimit jashtë ShBA-ve bazuar në marrëveshjet ndërqeveritare.
