Agjencia e lajmeve Associated Press i ka bërë jehonë deklaratës së Emisarit të BE’së Miroslav Lajçak i cili e ka ndërlidhur implementimin e marrëveshjve me zgjedhjet në Bashkimin Evropian. Lajçak ka thënë se ka udhëtuar në rajon për të parë se cfarë mund të bëhët deri atëherë.
Deklarata e tij është transmetuar nga agjencia Associated Press ndërsa është cituar edhe nga gazeta amerikane Washington Post.
Pjesë nga aritkulli i këtyre mediave prestigjioze:
I dërguari i BE-së për Ballkanin Perëndimor të martën i kërkoi Kosovës dhe Serbisë që të çojnë përpara me bisedimet e lëkundura të normalizimit përpara zgjedhjeve për Parlamentin Evropian në qershor.
Miroslav Lajçak u takua për tre orë me liderët më të lartë të Kosovës – Presidenten Vjosa Osmani, Kryeministrin Albin Kurti dhe Zëvendëskryeministrin Besnik Bislimi – në Prishtinë pasi vizitoi Beogradin një ditë më parë.
“Ne as nuk duhet të pyesim veten se si ta bëjmë atë (marrëveshjen). Pyetja është se kur duhet bërë. Dhe, sigurisht, nëse më pyesni mua, do të thoja pa vonesë, sa më shpejt të jetë e mundur”, u tha Lajçak gazetarëve.
BE-ja dhe Shtetet e Bashkuara po u bëjnë presion të dyja vendeve që të zbatojnë marrëveshjet që presidenti serb Aleksandar Vuçiq dhe Kurti arritën në shkurt dhe mars.
27 vendet anëtare të Bashkimit Evropian do të mbajnë zgjedhjet parlamentare të BE-së në qershor, ndërsa Shtetet e Bashkuara shkojnë në zgjedhje në nëntor, vuri në dukje Lajçak, duke shtuar: “Kjo do të thotë se vëmendja, natyrisht, në fund të këtij viti do të përqendrohet në këto procese”.
Bisedimet e normalizimit të ndërmjetësuara nga BE nuk kanë arritur të bëjnë përparim, veçanërisht pas një shkëmbimi zjarri shtatorin e kaluar midis të armatosurve serbë të maskuar dhe policisë së Kosovës që la të vdekur katër persona dhe rriti tensionet në rajon.
Si Serbia ashtu edhe Kosova kanë thënë se duan të anëtarësohen në BE, por shefi i politikës së jashtme të BE-së Josep Borrell ka thënë se refuzimi i tyre për të bërë kompromis po rrezikon shanset e tyre për anëtarësim.
Lajçak përmendi si shenja pozitive për të dyja vendet aplikimin e një marrëveshjeje për pagesën e energjisë së konsumuar në veriun e Kosovës, ku jeton shumica e pakicës etnike serbe, dhe njohjen e njëri-tjetrit për targat e veturave.
