Aktivistja për të drejtat e njeriut, Vasfije Krasniqi Goodman, e para e mbijetuar e dhunës seksuale gjatë luftës në Kosovë që tregoi historinë e saj dhe një nga zërat kryesorë në botë kundër dhunës seksuale gjatë luftës, po viziton Izraelin midis 5-8 shkurtit si mysafire e Shurat HaDin për t’i parë mizoritë e Hamasit, të tregojë solidaritet me viktimat izraelite dhe të kërkojë sjelljen e terroristëve të Hamasit “Nukhba” para drejtësisë për sulme seksuale.
Krasniqi ishte vetëm 16 vjeçe kur u rrëmbye nga fshati i saj dhe u përdhunua nga dy policë serbë. Ajo u bë simbol i luftës kundër dhunës seksuale gjatë luftës kur luftoi për të sjellë para drejtësisë përdhunuesit e saj. Në vitin 2021, Presidentja e Kosovës e shpalli 14 prillin, ditën e përdhunimit të Krasniqit, “Ditën e të Mbijetuarve të Dhunës Seksuale” në Kosovë. Krasniqi është rikthyer në Kosovë për t’u bërë deputete dhe sot konsiderohet si aktiviste kryesore e të drejtave të njeriut kundër dhunës seksuale, raporton “Jerusalem Post”.
Krasniqi iu përgjigj ftesës së organizatës Shurat HaDin për të vizituar Izraelin për të parë mizoritë e kryera nga Hamasi. Shurat HaDin është një organizatë joqeveritare e udhëhequr nga gratë e dedikuar për të luftuar terrorin dhe antisemitizmin, mbrojtjen e viktimave të terrorit dhe mbrojtjen e shtetit të Izraelit dhe qytetarëve të tij. Ishte organizata e parë që ngriti një padi në emër të një viktime të një sulmi terrorist. Viktima gjithashtu ishte sulmuar seksualisht.
Gjatë vizitës së saj, Krasniqi vizitoi Knessetin, ku u takua me kryetaren e Komisionit për të Drejtat e Grave të Knessetit, Pnina Tamanu Shata dhe deputetë të tjerë. Ajo gjithashtu do të takohet me viktimat dhe po viziton fshatrat e Izraelit jugor dhe vendin e Festivalit Nova, ku ndodhën sulmet.
Krasniqi foli për vizitën e saj në Izrael, duke thënë: “Ndihem e nderuar dhe e privilegjuar t’i përgjigjem thirrjes së Shurat HaDin për të ardhur në Izrael për të treguar mbështetjen dhe keqardhjen time për viktimat e krimeve të Hamasit. Është krejtësisht e padrejtë që komuniteti ndërkombëtar u ka kthyer shpinën grave dhe burrave izraelitë që ranë viktima të krimeve të tilla të tmerrshme për kaq shumë kohë. Do të kisha dashur të besoja se kemi arritur shumë që nga Kosova. Isha e shkatërruar kur pash këtë apati, injorancë dhe pandjeshmëri ndaj këtyre krimeve. Dua të bëj të qartë se autorët e sulmeve të tilla janë kriminelë lufte dhe duhet të sillen para drejtësisë. Dua gjithashtu të bëj të qartë se asnjë organizatë që kryen dhunë seksuale ose lejon që një gjë e tillë të ndodhë nuk duhet të legjitimohet ose të lejohet të mbajë pushtetin mbi asnjë popullsi. Njerëzit që janë të aftë për mizori të tilla janë një rrezik për qytetarët e tyre po aq sa janë për të tjerët”.
Delegacioni i Kosovës ka raportuar se dhuna ndaj grave e ushtruar nga Hamasi më 7 tetor nuk është parë ndonjëherë nga bota. Është diçka e paprecedentë dhe nuk mund të injorohet e as të harrohet.
“Vizita e Vasfijes në Izrael është një akt i guximshëm nga një grua e guximshme”, tha Nitsana Darshan-Leitner, themeluese dhe presidente e Shurat HaDin. “U deshën muaj që komuniteti ndërkombëtar të fillojë të përballet me të vërtetën e tmerrshme të ngjarjeve të 7 tetorit. Por më e rëndësishmja, ne ende nuk shohim veprime vendimtare nga qeveritë, OKB-ja, organizatat për të drejtat e grave, Kryqi i Kuq Ndërkombëtar, dhe organizata të tjera kundër Hamasit, i cili ende mban pengje izraelite që ne e dimë se po sulmohen në robëri ndërsa flasim. Shpresojmë që vizita e Vasfijes do të ndihmojë në rritjen e ndërgjegjësimit për këto mizori, nevojën për të ndjekur penalisht terroristët e Hamas Nukhba për krimet e luftës të sulmeve seksuale dhe nevojën për të çrrënjosur përdhunuesit e Hamasit nga Gaza”.
“Nuk mund të ketë asnjë ekuivokim apo justifikim, as ndonjë ‘kontekst’ kur bëhet fjalë për dhunën seksuale të Hamasit gjatë kohës së luftës. Vizita e Krasniqit do ta çojë këtë mesazh në adresën e duhur. Shurat HaDin kërkon që komandantët dhe militantët e Forcave Nukba të Hamasit të gjenden, ndiqen penalisht dhe dënohen për krimin famëkeq të luftës të dhunës seksuale dhe përdhunimit”.
Në fund të vitit që lamë pas, presidentja Vjosa Osmani njoftoi se e mbijetuara e dhunës seksuale gjatë luftës në Kosovë, Vasfije Krasniqi-Goodman është emëruar e dërguar e posaçme për dhunën seksuale gjatë luftës.
“Ajo i ka dhënë zë dhimbjes së mijëra grave të përdhunuara gjatë luftës në Kosovë. Në rolin e saj të ri, ajo do të vazhdojë kërkimin për drejtësi dhe do të përforcojë zërat e të mbijetuarve përreth globit”, pati shkruar Osmani në X më 30 dhjetor, 2023.
