Kryetarja e Listës “Guxo”, njëherit ministre e Punëve të Jashtme, Donika Gërvalla-Schëarz ka hedhur akuza ndaj Sami Lushtaku dhe Lidhjes Demokratike të Kosovës.
Gërvalla ka deklaruar se LDK lidhjen më të madhe e kanë me Sami Lushtakut, njërit prej figurave kryesore të Partisë Demokratike të Kosovës.
“E keni pa që ata edhe emrin nuk duan ta kenë më Lidhja Demokratike e Kosovës. Duan ta kenë emrin Rruga e re, Lidhja e ku ta di unë. Por lidhjen më të madhe e kanë me Sami Lushtakun”, ka thënë ajo.
Pikërisht për këtë akuzë, Gërvallës i është kundërpërgjigjur Sami Lushtaku.
Ai në një prononcim ka mohuar pretendimet e Gërvallës kinse se ka lidhje me LDK-në.
Lushtaku ka thënë që përveçse miq, nuk ka lidhje të tjera me LDK-në.
“Unë kam miq dhe shokë në të gjitha partitë politike. Me të kallxu drejtë me LDK-në kurrgjë nuk më lidh, nuk kam asnjë lidhje të kësaj natyre çfarë paska thënë Gërvalla, asnjë lidhje hiq, vetëm shokë. Ne në Kosovë jemi këtu secili e njeh secilin, ndonjë lidhje të veçantë nuk kam”, u shpreh ai.
Sipas Lushtakut, një gjë të tillë, Gërvalla e ka thënë për t’u bërë e rëndësishme me emër të tij.
“Kështu edhe një pjesë e politikanëve janë bërë të rëndësishëm me emër timin”, u shpreh ai.
