Fronti i përbashkët AAK-NISMA për zgjedhjet e ardhshme nga panelistët në emisionin “Këndi i Debatit” po shihet si kombinim i dy profileve ideologjike asaj të djathë e të majtë por, edhe si koalicion që ka për synim arritjen e numrave. Ndërsa, një lidhje të tillë partish për të garuar në zgjedhje po e vlerëson si krejt të natyrshme, përfaqësuesi i NISMA-s.
Ish-zëvendësministri i Punëve të Brendshme, Selami Shkodra, ka kërkuar sqarime se a janë diskutuar mosmarrëveshjet fillestare që mund të dalin, kur të ofrohet programi për qytetarët, duke qenë se këto dy parti kanë ideologji të kundërta.
“Këto dy subjekte kanë ideologji të kundërta, njëra tashmë është e profilizuar si parti e djathtë. Haradinaj pas kthimit nga Haga, herën e dytë, shprehimisht ka thënë se i takon spektrit të djathtë. Ndërsa Limaj që nga themelimi i subjektit NISMA, edhe emri i saj është socialdemokrate dhe është profilizuar si e spektrit të majtë. A besoni se do të ketë një program, dhe a është negociuar paraprakisht një program mes këtyre dy forcave politike për t’i ofruar qytetarëve me qëllim që të zgjidhen këto mos marrëveshje fillestare që mund të jenë?”, është shprehur ai.
Ndërsa sekretari i Përgjithshëm i NISMA-s, Bilall Sherifi, duke marrë shembull Gjermaninë, ka thënë se programi mund të harmonizohen lehtë nga dy e më shumë parti.
Për Sherifin, nuk është e panatyrshme që të lidhet një koalicion mes dy partive me ideologji të ndryshme.
“Nuk mendoj që është i panatyrshëm një koalicion mes dy partive që kanë ideologji të ndryshme, e ke Gjermaninë që për një dekadë të terë e kanë udhëheq koalicioni CDU,SPDE, pra e djathta dhe e majta. Pra në harmonizim të programeve shumë lehtë është që të përfshihen pika programore nga dy, tri apo katër subjekte”, është shprehur ai.
Përderisa për analistin, Arton Demhasaj në aspektin ideologjik ky koalicion nuk është ndonjë kombinim, por në rrafshin praktik po.
Sipas Demhasajt, edhe ky koalicion si gjithë të tjerët që janë bërë në vend, kanë pasur për qëllim arritjen e numrave.
“Zakonisht në Kosovë nuk është që ka pasur koalicione ideologjike, madje as partitë politike nuk e kanë ndonjë ideologji të qartë, thjeshtë e kanë vetëm atë sinkronizimi a janë të djathtë apo të majtë. Në aspektin ideologjik nuk është ndonjë kombinim, por kur e sheh në praktikë AAK dhe NISMA kanë pasur bashkëpunim edhe në të kaluarën, edhe në opozitë , edhe në Qeveri. Kështu që ka qenë një lloj bashkëpunimi i natyrshëm. Te ne koalicionet parazgjedhore e paszgjedhore nuk bëhen me qëllimin ideologjik, ose nuk bëhen me qëllimin që ideologjia e njërës më përmbush të tjetrës, më tepër kanë qenë koalicione të numrave”, ka thënë ai.
Aleanca për Ardhmërinë e Kosovës (AAK) dhe NISMA para dy muajve kanë lidhur zyrtarisht koalicion parazgjedhor. Kjo marrëveshje koalicioni u bë për zgjedhjet e përgjithshme të radhës (2024-2025).
