Kryeministri i Republikës së Kosovës, Albin Kurti, ka mbajtur një bashkëbisedim me ish- të burgosurit politikë dhe studentët në shënim të 43-vjetorit të demonstratave të vitit 1981, që u organizua në Mensën e Studentëve, në Prishtinë.
Duke kujtuar periudhën e asaj kohe, kryeministri Kurti tha se pranvera e vitit 1981 vazhdon të jetë një gurthemel i shtetit republikan të Kosovës së pavarur, por njëkohësisht edhe shembull i zellit studentor, që nuk përfundon me studimet, por vetëm sa nisë me to, meqenëse përfaqëson edhe pjesën më të emancipuar politikisht e kombëtarisht të popullit tonë e të shoqërisë sonë.
Ai ka shprehur falënderimin dhe mirënjohjen e thellë për të gjithë pjesëmarrësit e atyre demonstratave, duke theksuar se gjithçka kishte nisur më 4 mars këtu në Mensën e Studentëve, 11 marsi që u pasua edhe me 26 marsin dhe 1 e 2 prillin dhe u tronditën themelet e padrejta të Jugosllavisë, që patën për parullë kryesore atë që e kemi thënë të gjithë ne me aktivizmin tonë, pra Kosova Republikë.
“Nga Kosova Republikë te Republika e Kosovës, kështu pra lidhen brezat e shqiptarëve, të cilën bëjnë betejë të paepur për çlirim e për barazi”, tha kryeministri Kurti, duke theksuar se Kosova e pavarur që sot e gëzojmë në themelet e saj e ka sakrificën e shumë brezave, mundin e shumë gjeneratave, të cilët ne asnjëherë nuk i harrojmë dhe rregullisht i përkujtojmë.
Fjala e plotë e kryeministrit Kurti:
Të dashur studentë,
Të nderuar të pranishëm, zonja e zotërinj, motra e vëllezër,
Të nderuar kolegë nga Qeveria e Republikës së Kosovës, ministrja e Arsimit edhe ministri i Kulturës, Arbëria edhe Hajrullau,
Të nderuar bashkëveprimtarë të çështjes kombëtare,
Të nderuar aktivistë politikë, të cilët keni marrë pjesë dhe keni organizuar demonstratat gjithëpopullore të pranverës së vitit 1981, të cilat filluan si protesta studentore.
Këtu kemi disa prej tyre, kemi Hydajet Hysenin, Xhemajl Pllanën, Shefik Sadikun, Kadri Batushën dhe të tjerë, të cilët në atë kohë kur diskriminimi ndaj shqiptarëve, shfrytëzimi dhe padrejtësitë po shtoheshin, e ngritën zërin dhe në këtë mënyrë treguan që e ashtuquajtura Jugosllavi socialiste kishte popuj e njerëz që ishin më të barabartë se sa të tjerët. Dhe, në këtë mënyrë vetëdijësuan edhe opinionin publik ndërkombëtar, në kohën kur ngritja studentore e popullore shqiptare e Kosovës përputhej me “Solidarnostin” sindikalist në Poloni atëbotë.
Prandaj, pranvera e vitit 1981 vazhdon të jetë një gurthemel i shtetit republikan të Kosovës së pavarur, por njëkohësisht edhe shembull i zellit studentor, që nuk përfundon me studimet, por vetëm sa nisë me to, meqenëse përfaqëson edhe pjesën më të emancipuar politikisht e kombëtarisht të popullit tonë e të shoqërisë sonë.
Me këtë rast, dua të shpreh falënderimin dhe mirënjohjen e thellë për të gjithë pjesëmarrësit e atyre demonstratave. Ishte 4 marsi këtu në Mensën e Studentëve kur gjithçka filloi, 11 marsi që u pasua edhe me 26 marsin dhe 1 e 2 prillin dhe u tronditën themelet e padrejta të Jugosllavisë së AVNOIT, që patën për parullë kryesore atë që e kemi thënë të gjithë ne me aktivizmin tonë, pra Kosova Republikë.
Nga Kosova Republikë te Republika e Kosovës, kështu pra lidhen brezat e shqiptarëve, të cilët bëjnë betejë të paepur për çlirim e për barazi.
Jemi në Mensën e Studentëve, ku sot të lirë gëzojmë këtë Kosovë të pavarur, e cila në themelet e saj e ka sakrificën e shumë brezave, mundin e shumë gjeneratave, të cilët ne asnjëherë nuk i harrojmë dhe rregullisht i përkujtojmë.
Unë ju dëshiroj shumë shëndet, studime të mbara e sukses në jetë të gjithë studentëve që janë këtu, meqenëse këta janë tregues i të ardhmes ekonomike, politike e kulturore të Republikës sonë, të institucioneve të shtetit, të shoqërisë e të popullit.
Urime 11 Marsi, kjo ditë e kryengritjes studentore që u bë gjithëpopullore, e tash kisha dashur që t’ia jap fjalën edhe Hydajet Hysenit, i cili në fotografinë e famshme të demonstratave të marsit e të prillit të vitit 1981 është aty në pemë me megafon, e pranë tij është Kadri Batusha, i cili sërish është pranë Hydajetit, por kësaj radhe këtu në Mensë të Studentëve.
Faleminderit.
Pamje nga vizita
