Dhjetëra gjoba janë shqiptuar ndaj barnatoreve në Kryeqytet shkaku i shkeljes së orarit të punës të përcaktuar me rregulloren e re për orar të kujdestarive. Kështu ka bërë të ditur për Ekonomia Online, drejtori i Inspektoratit të Kryeqytetit, Florian Dushi.
Ndonëse nuk ka treguar për numrin e gjobave të shqiptuar, Dushi ka thënë se arsyet e gjobave janë të ndryshme, përfshirë tejkalimin e orarit dhe që punojnë vikendit.
“Ka me dhjetëra gjoba të cilat janë shqiptuar dhe kryesisht për barnatoret të cilat nuk respektojnë orarin e punës, pra e tejkalojnë orarin e punës apo edhe punojnë në ditët e vikendit në ditët të cilat ata nuk janë përcaktuar të kujdestarojnë”, thotë Dushi.
Ai shtoi se, Inspektorati është në vazhdimësi në inspektim të respektimit të orarit të punës.
“Si inspektorat jemi në inspektim të respektimit të orarit të punës dhe respektim të rregullores së punës së tyre dhe po mundohemi të detyrojmë apo të i shtyjmë të njëjtat që të respektojnë orarin të cilin fatmirësisht është ndërtuar në koordinim të plotë me ta nga ana e Drejtorisë së Shëndetësisë”, deklaroi Dushi.
Ndërsa, orari i barnatoreve i përcaktuar nga rregullorja në fuqi, do të vazhdojë edhe tutje deri në rishikim.
“Orari për barnatoret do të vazhdojë për aq sa do të jetë rregullorja në fuqi, ndërkohë ka pas një rishikim të rregullores dhe aprovim të këtyre korrigjimeve do të thoja që janë bërë në rregullore dhe ndryshimeve sa i përket edhe orarit të punës. Por e njëjta nuk është në fuqi akoma, pra ndryshimet e reja nuk kanë hyrë në fuqi, prandaj ne i referohemi edhe më tutje orarit të punës dhe përcaktimeve që ka bërë rregullorja e vjetër”, u shpreh Dushi. /EO
