Politologu Melazim Koci, konsideron se fjalori i Bashkimit Evropian në reagimin e tyre pas aksionit policor në veri, është i ngjashëm me atë të rastit në Banjskë.
Koci thotë se nga të gjitha reagimet, në secilën prej tyre është përmendur mundësia për përshkallëzim të situatës.
“Ajo që është evidente sot nga reagimi unanim i SHBA-ve, BE-së, KFOR-it, Britanisë së Madhe, është dënimi i këtij aksioni. Në secilën nga kumtesat përmendej mundësia e përshkallëzimit të situatës dhe e dyta, fjalori që përdori BE-ja më përkujtoi fillimin e shtatorit të vitit të kaluar para ndërhyrjes së Serbisë në Banjskë, edhe atëherë BE-ja pati fajësuar Kosovën dhe shpalli Serbinë si faktor konstruktiv dhe Serbia e shfrytëzoi atë moment për të goditur”, thotë ai.
Ai thekson se kjo flet “më shumë për shterpësinë e BE-së në raport me dialogun Kosovë-Serbi dhe për njëanshmërinë e tyre”.
“E treta që desha të potencoj është fakti që pavarësisht se dënimi është unanim nga ana e Bashkësisë Ndërkombëtare jam pak i habitur me ashpërsinë që e ka në kumtesë BE-ja sepse ka pasuar pas 7 raundeve të dështuara të dialogut dhe pas një refuzimi të Serbisë që të pranojë madje edhe ofertën e Lajçakut. BE-ja këtë e ka heshtur”, shtoi ai.
