Një grua është arrestuar të enjten si e dyshuar për dhënien e ndihmës pas plagosjes së trefishtë në Pejë.
Kështu ka njoftuar Policia e Kosovës në raportin 24-orësh të premten, duke konfirmuar edhe arrestimin e të dyshuarit kryesor për plagosjen e tre personave.
“Rr. Bekim Berisha, Pejë 22.05.2024 – 21:25. Më 23.05.2024 është arrestuar një femër kosovare si e dyshuar për dhënie të ndihmës pas kryerjes së veprës penale, si dhe një mashkull kosovar për veprën ‘Vrasje e rëndë’ në tentativë. Me vendim të prokurorit të dyshuarit janë dërguar në mbajtje”, ka njoftuar PK-ja.
Agron Gashi, me nofkën “Gon Ozdrimi”, i dyshuari kryesor për plagosjen në Pejë, ishte në kërkim nga Policia nga mbrëmja e mërkurë.
Arrestimin e tij e ka konfirmuar edhe zëdhënësi i Prokurorisë Themelore në Pejë, Shkodran Nikçi.
Njëri nga tre të plagosurit të mëkurën në Pejë është në gjendje të rëndë dhe po trajtohet në Klinikën Intensive në QKUK.
Ndërsa, rreth 15 orë pasi i plagosi dy djemtë dhe babain e tyre, me revole, 21 vjeçari Agron Gashi është arrestuar në një shtëpi në fshatin Ozdrim, vendlindja e tij.
