Kryetari i Partisë Demokratike të Kosovës, Memli Krasniqi, ka thënë se roli ish-kryeministrit të Britanisë së Madhe, Toni Blair për Kosovën dhe përkushtimi për të mbrojtur lirinë dhe drejtësinë ka qenë frymëzim për të gjithë.
Krasniqi pas takimit që Blair ka zhvilluar me liderët e partive opozitare, ka thënë se biseda tregoi për rëndësinë e bashkëpunimit të mirë më ndërkombëtarët.
“Biseda jonë e sotme nënvizoi edhe një herë rëndësinë e bashkëpunimit të mirë ndërkombëtar, krijimit të partneriteteve dhe kultivimit të raporteve të besueshme – në funksion të sigurimit të paqes, stabilitetit dhe integrimit euro-atlantik të vendit tonë. Ish-Kryeministrit Blair i shpreha mirënjohjen e përjetshme të popullit tonë për mbështetjen e tij të vazhdueshme për Kosovën, posaçërisht atëherë kur kishim më së shumti nevojë. Kosova nuk do të harrojë asnjëherë liderishipin tuaj, zotëri Kryeministër!”, ka shkruar Krasniqi.
Blair po qëndron në Kosovë në vigjilje të 25-vjetorit të çlirimit të Kosovës.
Ai ka zhvilluar takim me krerët shtetëror dhe ka mbajtur një adresim para deputetëve të Kuvendit të Kosovës.
Ish-kryeministri britanik është takuar edhe me kryetarin e Prishtinës, Përparim Rama.
