Gazeta britanike, Financial Times ka publikuar një artikull të gjatë për Serbinë dhe lojën e saj politike me fuqitë e mëdha.
Duke e vënë mundësinë e kthimit të Donald Trump në Shtëpinë e Bardhë në qendër të tekstit, FT shkruan se pikëpyetja e madhe për rajonin tash është se si mund të ndikojë rizgjedhja e tij në Ballkanin Perëndimor.Negociatorët e BE-së ndërmjetësuan vitin e kaluar një marrëveshje, të mbështetur nga administrata Biden, sipas së cilës Serbia do të lejonte joformalisht Kosovën të integrohej në organizatat ndërkombëtare, ndërsa Kosova do t’u jepte autonomi më të madhe rajoneve me shumicë serbe. Por marrëveshja nuk u zbatua kurrë.
Intensiteti i negociatave mund të rritet në mënyrë dramatike nëse Trump rizgjedhet, shkruan FT. Richard Grenell ka sinjalizuar në diskutime private se nëse ai emërohet në një rol të lartë në një mandat të dytë të mundshëm të Trump, Ballkani do të ishte prioritet për të dhe se ai e sheh Serbinë dhe rajonin si një aleat natyror të Amerikës.
Kur Grenell ishte i dërguari i Ballkanit, ai shtyu fort për një marrëveshje, sipas diplomatëve në rajon. Ai ndërpreu strategjitë e BE-së duke argumentuar për një zgjidhje të shpejtë, duke zemëruar shumë zyrtarë europianë dhe disa diplomatë të Departamentit të Shtetit me tonin e tij konfrontues.
Ai gjithashtu bëri të qartë se kishte pak kohë për qëndrimin e Albin Kurtit, kryeministrit të Kosovës. Vitin e kaluar, zyrtarët e BE-së dhe administrata e Bidenit gjithashtu janë frustruar me Kurtin, duke e akuzuar atë si të pakompromis dhe që minon shpresën për një zgjidhje.
Zyrtarët kosovarë dhe kundërshtarët vendas shqetësohen se një administratë e dytë Trump do të ishte e butë ndaj Vuçiqit. Aleatët e Grenellit përgjigjen duke treguar se si ai, në të kaluarën, i ka ushtruar presion Vuçiqit për t’u larguar nga Moska dhe e kanë shtyrë atë ta diversifikojë furnizimin e tij me energji nga Rusia, e cila siguron pjesën më të madhe të gazit të Serbisë.
Për Vuçiqin, një shtytje e përshpejtuar për një marrëveshje do të përbënte një dilemë. Pranimi i pavarësisë së Kosovës është një kusht formal për integrimin e Serbisë në BE. Megjithatë, të dorëzohesh ndaj presionit të perëndimit dhe të pajtohesh me të mund të jetë vetëvrasje politike.
