Të premten ka përfunduar procesi i zëvendësimit të patentë shoferëve të Serbisë me shenjat e qyteteve të Kosovës në patentë të lëshuara nga Ministria e Brendshme e Kosovës. Nga dita e sotme, drejtuesit e automjeteve që nuk kanë ndërruar dokumentet, gjobiten nëse kapen nga policia rrugore duke drejtuar automjetet e tyre.
E për këtë çështje, ish-zëvendësministri i Brendshëm, Selam Shkodra ka deklaruar se pas skadimit të këtij afati, policia do të kursejë dispozitat ligjore në fuqi, ku të njëjtit do të gjobiten në vlerat e parapara sipas normave në fuqi.
Derisa, ky i fundit ka thënë se nuk pret ndonjë reagim nga komuniteti serb, pasi që të njëjtit kanë pasur mjaftueshëm kohën e tyre për t`u pajisur me dokumentet.
Tutje, ai bëri të ditur se do të ketë deklarime politike si nga Beogradi zyrtar dhe parti politike serbe, ku sipas Shkodrës nuk do të ketë lëvizje që mund të sfidojnë sigurinë e vendit.
“Pas skadimit të këtij afati që fillon të rrjedhë sot, natyrshëm që institucionet e sigurisë respektivisht policia e trafikut do të kursejë dispozitat ligjore në fuqi dhe të njëjtit do të gjobitë më vlerat e parapara sipas normave në fuqi. Nuk pres ndonjë reagim nga komuniteti serb pasi që të njëjtit kanë pasur mjaftueshëm kohen e tyre për t`u pajisur me dokumentet mjaftë të rëndësishme për të lëvizur qytetarët me makina. Gjithsesi do të ketë deklarime politike si nga Beogradi zyrtar dhe parti politike serbe, por nuk mendojë që do të ketë lëvizje që mund të sfidojnë sigurinë e vendit”, ka deklaruar Shkodra.
I pyetur për vizitën e shefit të CIA-s William Burns në Kosovë, Shkodra tha se vizita e Burns ishte vizitë specifike.
Derisa, ai shtoi se në theks të veçantë të bisedave Burns e ka pasur Kosovën, ku ia ka bërë të qartë presidentit të Serbisë, se nuk do të lejohet një destabilizim i Kosovës në asnjë formë.
“Vizita e kryespiunit amerikan nuk ishte vizitë specifike vetëm në Kosovë, i njëjti vizitoi gjithë rajonin dhe filloi nga pika e vlimit në kryeqytetin e Bosnjës në Sarajevë. Portaleve dhe gazetave prestigjioze veçanërisht ajo e BBC-së në gjuhën serbe ka pasur fokus të bisedave Burns me theks të veçantë Kosovën dhe siç duket ia ka bërë të qartë presidentit të Serbisë se nuk do të lejohet një destabilizim i Kosovës në asnjë formë. Ishte nder për në që Burns bëri natën në Kosovë, dhe kaloi më shumë se 24-orë në Kosovë, takoi krerët e shtetit, sipas atyre që ka njoftuar Qeveria është folur për një partneritet strategjik afatgjatë mes Kosovës dhe SHBA-ve që për neve është jashtëzakonisht e rëndësishme”, shtoi Shkodra.
Ndryshe, Shkodra mendon se ka pasur një kërkesë prej Burns ndaj Kurtit, për shtyrjen e vendimit për hapjen dhe qarkullimin e automjeteve të urës kryesore të Ibrit.
“Unë nuk e përjashtoi mundësinë që Burns ka biseduar me kryeministrin për të gjitha detajet të cilat mund të qojnë rajonin drejt një tensioni. Mendoj që mund të ketë pasur një kërkesë të tillë që t`i kërkohet institucioneve të Kosovës që të ketë një mirëkuptim për bashkësinë ndërkombëtare dhe të ketë një shtyrje të vendimit për hapjen dhje qarkullimin e automjeteve të urës kryesore të Ibrit. Mendoj që duhet të bëjë mirë Qeveria që t`i dëgjonte këshillat e Burns, sepse nuk është format as i ambasadorëve dhe as zëdhënësve të BE-së, por është njeriu më i formuar në glob. Është njeriu që e njeh mirë situatën e Kosovës”, deklaroi Shkodra.
