Në përfundim të vizitës së saj zyrtare, ministrja e Drejtësisë, Albulena Haxhiu, vizitoi Drejtorinë e Përgjithshme të Shërbimit Korrektues dhe Sprovues të Republikës së Turqisë.
Gjatë kësaj vizite, Haxhiu u prit nga Drejtori i Përgjithshëm i Burgjeve dhe Paraburgimit të Turqisë, Yavuz Yildirim. Gjatë takimit, u zhvilluan diskutime të rëndësishme mbi reformat dhe praktikat më të mira në menaxhimin e sistemit të burgjeve dhe rehabilitimin e të burgosurve.
“Ministrja Haxhiu u njoh nga afër me mënyrën e funksionimit të këtij sistemi dhe me praktikat që autoritetet turke zbatojnë për menaxhimin e institucioneve të tyre”, thuhet në njoftimin e ministrisë.
“Ministrja Haxhiu gjithashtu vuri në pah arritjet e Shërbimit Korrektues të Kosovës (SHKK), si ngritja e infrastrukturës ligjore, krijimi i njësive në institucionet korrektuese, themelimi i Institucionit për Trajtimin e Personave me Nevoja të Veçanta dhe zgjerimi i Institutit të Psikiatrisë Forenzike. Ajo e konsideroi të domosdoshme rritjen e sigurisë përmes pajisjeve të reja teknologjike, si dhe përmirësimin e aftësive profesionale të stafit përmes trajnimeve të avancuara për situatat emergjente dhe për përcjelljen e të burgosurve”.
Gjithashtu, Haxhiu vizitoi edhe Drejtorinë e Përgjithshme të Teknologjisë së Informacionit, ku pa nga afër menaxhimin e databazave dhe mënyrën se si zhvillohet dhe monitorohet sistemi i drejtësisë.
“Në përfundim, ministrja Haxhiu theksoi rëndësinë e forcimit të kapaciteteve të institucioneve të drejtësisë në Kosovë, përmes trajnimeve dhe shkëmbimit të përvojave me Turqinë në menaxhimin e sistemit të burgjeve, atij sprovues dhe Teknologjise se Informacionit, me qëllim të rehabilitimit dhe riedukimit të të burgosurve si pjesë e procesit të integrimit dhe risocializimit të tyre në shoqëri”.
