Ads: Merr BB VIP Falas me Premium 12 Mujore

Lajme

Zgjedhjet në Kosovë: Kush voton e kush jo dhe pse ka rëndësi?

 
   

Në nëntë palë zgjedhjet e mbajtura në Kosovë pas shpalljes së pavarësisë më 2008, kanë votuar më pak se 50 për qind e gjithsej votuesve të regjistruar.

Por, jo të gjitha grupet – komunitetet etnike, gjinitë e grup-moshat – janë paraqitur në vendvotime në të njëjtën përqindje.

Të dhënat e ndara për gjini tregojnë se burrat votojnë në përqindje më të lartë se gratë.

Burrat votojnë më shumë se gratë në zgjedhjet në Kosovë

Në të gjitha zgjedhjet, përveç zgjedhjeve lokale të vitit 2013, burrat në Kosovë kanë votuar në përqindje më të lartë sesa gratë. Në zgjedhjet e fundit parlamentare, ky hendek është rritur në krahasim me zgjedhjet paraprake.

Ndërkohë, janë të rinjtë ata që në ditën e zgjedhjeve drejtohen te vendvotimet në përqindjen më të lartë.

Mbi 53 për qind e të rinjve që për herë të parë kishin mundësinë e votimit, e shfrytëzuan atë në zgjedhjet parlamentare të vitit 2021. Asnjë grup-moshë tjetër nuk kishte përqindje më të lartë të votimit, ndërsa në vendin e dytë ishte grup-mosha nga 41 në 44 vjeç, me gati 49 për qind.

Të dhëna të ngjashme janë të qasshme edhe për votuesit e shumë prej vendeve të zhvilluara perëndimore.

Komisionin Qendror të Zgjedhjeve në Kosovë nuk ka treguar nëse të dhëna të tilla do të mbledhin për zgjedhjet e ardhshme parlamentare, që do të mbahen më 9 shkurt.

Kelly Dittmar, nga Qendra amerikane për Gratë dhe Politikë, tregon se, në SHBA, këto të dhëna kanë qenë të qasshme për publikun që nga viti 1980 dhe kanë luajtur rol tejet të rëndësishëm.

Në punën tonë, shpesh flasim për vlerën e të dhënave në përcaktimin e një problemi. Dhe, pasi ta kesh përcaktuar problemin, mund të fillosh të kërkosh zgjidhje”, thotë Dittmar për Radion Evropa e Lirë.

Ajo tregon se, në SHBA, kjo gjë ka çuar në ndryshime konkrete, si rritja e presionit mbi partitë për të nominuar gra në pozita udhëheqëse dhe adresimi i politikave që pasqyrojnë përvojat e jetuara të grave.

Përmes këtyre të dhënave, institucionet dhe shoqëria civile mund të analizojë se komunitete nënvotojnë dhe kështu mund të marrin iniciativa për të nxitur pjesëmarrje më të madhe politike të tyre, thotë Dittmar.

Megjithatë, ajo thekson se shpesh ka arsye për mungesën e këtyre të dhënave.

Nëse të dhënat zbulojnë një hendek gjinor, por ka frikë se potenciali i grave vjen me një ideologji dhe parti specifike, atëherë mund t’i frikësohen definimit të problemit”, thotë Dittmar.

Në anën tjetër, nëse gratë votojnë në shkallë të lartë, mund të ketë dëshirë të mos fuqizohet kjo gjë në shoqëritë ku burrat tentojnë ta parandalojnë një lloj uniteti në mesin e grave”, shton ajo.

Për këto dy arsye, beson Dittmar, “absolutisht që mund të ketë njerëz në fuqi, veçanërisht burra, që nuk duan që këto të dhëna të bëhen të ditura”.

Në zgjedhjet parlamentare të vitit 2021, në Kosovë ishin mbi 1.8 milion votues të regjistruar. Por, në fund, vetëm 48.78 për qind e tyre votuan.