2
Gati 4 muaj iu deshën Korporatës Energjetike të Kosovës (KEK) për të finalizuar një konkurs përmes së cilit në punë u pranuan 220 punëtorë.
Konkursi për manipulues të shiritit, hinkës dhe kabinës II që u hap në shtator të 2024-ës, u përmbyll tek pesë ditë para se të hapet zyrtarisht fushata zgjedhore, më 6 janar të 2025-ës, raporton Kiks Kosova.
E ky konkurs hodhi poshtë teorinë e kryeministrit në detyrë, Albin Kurti, i cili konstatonte se kushërinjtë janë vetëm për dasma.
Këtë tezë atij ia rrëzoi hiç më larg se Bekir Gërguri, i cili e ushtroi detyrën e kryeshefit të KEK-ut deri më 28 shkurt të 2025-ës, kur e shkarkoi Bordi i drejtorëve të kësaj ndërmarrjeje.
KEK-u nuk e publikoi listën e të punësuarve, madje këtë listë nuk ia dërgoi as emisionit pavarësisht kërkesës, e rikërkesës që Kiksi i adresoi në këtë ndërmarrje, bazuar në Ligjin për Qasje në Dokumente Publike.
Fshehja e listës finale me emrat e të punësuarve mori kuptim, kur një pjesë të saj arriti ta siguronte Kiksi përmes burimeve të veta.
Nga 220 punëtorët e rinj që u rekrutuan sa Gërguri ishte kryeshef, 85 janë nga fshati Bardh i Madh, nga vjen edhe vetë ai, e 12 prej tyre mbajnë edhe mbiemrin e tij.
Kiks Kosova ka kontaktuar me Gërguri sa mbante ende pozitën e kryeshefit të KEK-ut për ta pyetur nëse ai ka ndikuar në punësimin e bashkëfshatarëve e kushërinjve të tij, por i njëjti ka refuzuar të përgjigjet me arsyetimin se është i zënë.
Për punësimin e kushërinjve nuk pranoi të prononcohet as drejtoresha e Prokurimit në KEK, Mirvete Gërguri, e cila po ashtu është nga i njëjti fshat me tani ish-kryeshefin.
Gërgurët nuk janë të vetmit që ia panë hairin këtij konkursi. Në listën e të punësuarve, të cilën e ka siguruara Kiksi, gjenden të paktën 7 kushërinj të Bashkim Xhigolit, i cili mban pozitën e menaxherit të Departamentit të Djerrinës në KEK.
Se këta janë kushërinjtë e tij, Kiksit ia konfirmoi vetë Xhigoli, ndonëse pohonte se ata janë kushërinj të largët dhe nuk ka lidhje të afërta gjaku me ta.
Xhigoli e mohon se ai e ka shfrytëzuar autoritetin e tij në KEK për t’i punësuar ata.
Në këtë listë nuk munguan as kushërinjtë e Jakup Pllanës, drejtorit të Termocentralit “Kosova B”.
Megjithatë, nga 10 personat me mbiemrin Pllana të cilët vijnë nga fshati i tij, drejtori i Kosovës B thotë se e njeh vetëm njërin, të cilin e pranon se e ka kushëri.
Sipas Jakupit, kushëriri i tij Mustafa ishte pranuar edhe një herë në KEK, por ishte larguar nga puna për shkak të familjarizmit.
Brenda listës gjenden edhe tetë kandidatë me mbiemrin Krasniqi nga Bardhi i Madh, nga vjen dhe Arsim Krasniqi, drejtori ekzekutiv i Departamentit të Qymyrit, i cili e bëri kërkesën për punësimin e 220 punëtorëve.
Megjithatë, në një telefonatë për Kiksin, Krasniqi e ka mohuar se e njeh ndonjërin nga të punësuarit apo se ka ndikuar në punësimin e tyre.
Por, ai nuk e mohoi se gjatë kohës së konkursit ka pranuar telefonata nga kandidatë të ndryshëm nga fshati i tij, të cilët kanë kërkuar që ai t’u ndihmojë në punësim.
Përveç kërkesave për qasje në listën finale me të punësuarit, Kiksi ka pyetur KEK-un me shkrim nëse personat me pozita të larta në menaxhmentin e kësaj ndërmarrjeje kanë ndikuar në punësimin e kushërinjve të tyre, por që nga 19 shkurti, kur i ka dërguar pyetjet, emisioni nuk ka pranuar përgjigje.
Nga KEK-u nuk janë përgjigjur as kush kanë qenë anëtarët e komisionit të cilët kanë bërë vlerësimet e kandidatëve.
