Duda Balje e gatshme të flasë edhe me opozitën për krijimin e Qeverisë, kushtet mbesin të njejta si për Kurtin
Deputetja e zgjedhur e Kuvendit të Kosovës dhe kryetarja e Partisë “SDU”, Duda Balje, ka thënë se për krijimin e një koalicioni qeverisës është e gatshme që të flasë edhe me partitë opozitare.
Ajo ka thënë se kushtet e njëjta vlejnë edhe për partitë opozitare, që janë krijimi i një komune boshnjake dhe reforma në arsim.
“Po kemi folë. Ne jemi pjesë e Kuvendit, kemi drejt me folë me secilin, secila parti shqiptare që ka 51 vota, ne si komunitet jemi këtu”, ka thënë Balje.
Kreu i LVV-së, Albin Kurti, ka takuar dje edhe tre deputetët e tjerë të zgjedhur, Nenad Rashiqin, Emilia Rexhepin dhe Elbert Krasniqin.
Balje me kërkesë për komunë në takim me Kurtin, pasi e kryen: Nuk kemi marrë dhe as s’kemi dhënë konfirmim që e votoj Qeverinë
Deputetja e zgjedhur, Duda Balje, sot ka mbajtur takimin e parë me kryeministrin në detyrë, Albin Kurti, për bisedime rreth formimit të qeverisë.
Balje tha se Kurtit ia ka prezantuar kushtet e saj në këmbim të votës dhe tha se nuk ka marrë konfirmimin nga Kurti nëse ato do të plotësohen dhe se rrjedhimisht as nuk ka dhënë konfirmim për votimin e qeverisë.
“Sot ne kemi pasë takimin e parë. Unë dola para kryeministrit me kërkesat që ne si boshnjakë kemi. Nuk kemi marrë asnjë konfirmim dhe nuk kemi dhënë asnjë konfirmim. Tash për tash jemi në fazën e bisedimeve. S’ka asgjë konkrete”.
Balje tha se kërkesat e saj janë “komuna e boshnjakëve, reforma në arsim, trajtimi i barabartë për krejt deputetët që kanë një votë brenda Kuvendit. Takimin e radhës nuk e kemi caktuar ende”.
Balje tha se ka mbetur që edhe nga ana e Kurtit “të mendojë” dhe më pas të kthejë përgjigje.
Gjithashtu, deputetja Balje tha se nuk e di me siguri nëse do të votojë për zgjedhjen e kryeparlamentarit më 15 prill pa e marrë sigurinë se do t’i plotësohen kërkesat.
“Ne kemi takimin në Kryesi të partisë dhe pastaj do të vendosim”.
Duda Balje në takim me Kurtin, pritet të diskutojnë për formimin e qeverisë
Kryetarja e Listës së Bashkimit Demokrat, Duda Balje e shoqëruar nga disa bashkëpartiak sapo ka arritur në objektin e Qeverisë së Kosovës për t’u takuar me kryeministrin në detyrë, Albin Kurti ku do të diskutojnë për formimin e qeverisë. Kurti sot takoi edhe Fikrim Damka nga Partia Demokratike Turke e Kosovës.
Gjatë ditës së djeshme Albin Kurti ka bërë të ditur se ka filluar konsultimet me komunitetet jo shumicë për formimin e qeverisë së re. Ai tha të mërkurën se ka takuar kryetaren e Partia e Re Demokratike (NDS) nga komuniteti boshnjak, Emilija Rexhepi, kryetarin e Partisë për Liri, Drejtësi dhe Mbijetesë nga komuniteti serb, Nenad Rashiq, si dhe kryetarin e partisë Iniciativa e Re Demokratike e Kosovës (IRDK), Elbert Krasniqi, ku diskutuan mbi formimin e qeverisë së re.
Kujtojmë, Lëvizja Vetëvendosje ka fituar zgjedhjet parlamentare të 9 shkurtit, me 42.3 për qind. E dyta renditet, PDK me 20.95 për qind, pasuar nga LDK 18.27 për qind dhe koalicioni AAK-Nisma 7.06 për qind. Në bazë të këtyre shifrave, Lëvizja Vetëvendosje do t’i ketë 48 deputetë, PDK 24, LDK 20, AAK-Nisma 8, dhe komunitetet jo shumicë 20 ulëse të rezervuara.
Presidentja e Kosovës, Vjosa Osmani e ka caktuar 15 prillin si datë për mbajtjen e seancës konstituive të legjislaturës së re, e dalë nga zgjedhjet e 9 shkurtit.
