Kreu i LDK-së Lumir Abdixhiku është shprehur i ashpër ndaj kryeministrit Albin Kurti, ai në një status në Facebook-un e tij teksa tregoi për vizitën e bërë në Viti, aty ku qeveris partia e tij, tha se ne nivelin qendror po futemi në vitin e katërt të “pushtetit popullist”.
Andaj sipas tij, me qeverinë Kurti “ndryshimet thelbësore, projektet zhvillimore, nuk kanë për të ardhur asnjëherë”.
“Për popullistët, zhvillimi vërtetë është i vështirë”, vijon Abdixhiku, transmeton Express.
Ai shpreh brengë për largimin e qytetarëve nga vendi duke thënë “koha po na ikën, njerëzit po na largohen, gjersa vendi mbetë peng kolektiv i popullizmit simbolik”.
Postimi i plotë:
Javë e re, takime mobiliziuese të tjera!
Sonte qëndrova në Viti.
Aty takova strukturat udhëheqëse të degës sonë; kryesinë e degës, kryetarët e nëndegëve, forumet e këshilltarët lokal. Një strukturë sa vitale aq dhe me plot vullnet! Mes bashkëpartiakëve të Lidhjes, shtrova kërkesën për mobilizim partiak gjithënacional; siç dhe parashtrova planet tona për këtë vit zgjedhor.
Teksa po futemi në vitin e katërt të pushtetit popullist, me plot 12 miliardë euro të menaxhuara në vetëm katër vjet; për qytetarët në çdo anë po bëhet gjithnjë më e qartë se shenjat e mëdha, ndryshimet thelbësore, projektet zhvillimore, nuk kanë për të ardhur asnjëherë.
Sepse zhvillimi nuk është synim. Për popullistët, zhvillimi vërtetë është i vështirë!
Në vend të kësaj, ne po udhëhiqemi nga politika të vazhdueshme përplot simbolikë. Aso të zhurmshme që marrin vëmendje dy-tre muajshe, por s’japin një ndryshim të vetëm për t’u mbajtur në mend; as në ekonomi, as në infrastrukturë, energjetikë, arsim, shëndetësi, sport apo kulturë. Zero ndryshim!
Koha po na ikën, njerëzit po na largohen, gjersa vendi mbetë peng kolektiv i popullizmit simbolik.
Rruga e Re është zgjidhja! Le të flasim për zhvillim!
LDK do të qëndroj në çdo qytet e fshat, për të shpërndarë mesazhin tonë të qartë. Strukturat tona janë gati! Lidhja është gati!
