Agjencia për Menaxhim të Emergjencave, përveç inspektimit të rregullt, ka filluar një inspektim të jashtëzakonshëm në objekte në të cilat numër i madh i qytetarëve i vizitojnë. E gjithë kjo me qëllim të krijimit të kushteve të sigurisë për jetën dhe pronën e qytetarëve.
“Në dalje të vendosen dritat emergjente gjatë evakuimit me pas ndriçim, mos me metë në errësirë. Nëpër secilin kat kemi shkuar duke dhënë masat kundër zjarrit ku disa nga masat janë në masën e duhur e disa tjera kanë mbetur për tu plotësuar”, sugjerojnë inspektorë përgjegjës të objekteve të cilat duhet t’i përmbushin kriteret në rast të ndonjë fatkeqësie nga zjarri.
“Kjo vjen si rezultat i veprimeve tona në parandalim të cilat zakonisht i kemi veprime të rregullta të cilat i marrim si në nivelin qendror edhe në nivelin lokal, mirëpo ky inspektim ka të bëj kryesisht me masat e parandalimit, do të thotë me masat e mbrojtjes nga zjarri dhe është i përqendruar në vendet ku është i përqendruar numër i madh i njerëzve”, tha Genc Metaj, drejtor i AME-së.
Nga ky institucion thonë se do të jenë të pakompromis me inspektimet, për ta shmangur çdo rrezik.
“Kolegët tanë duke e bërë inspektimin e jashtëzakonshëm në lokale në disa lokacione në regjionin e Prishtinës, sonte kanë bërë inspektime dhe kanë hasur në disa parregullsi ku ato parregullsi do ti paraqesin në raportin dhe do t’i japin një afat kohor që duhet ti përmirësojnë bizneset në fjalë sa ma shpejt që është e mundur”, tha Kastriot Lajqi, kryeinspektor i AME-së.
Inspektime do të ketë edhe në pjesë tjera të vendit, thonë zyrtarë të Agjencisë.
“Do të jemi edhe nëpër komuna tjera në të gjitha zonat, në të gjitha vendet ku ka frekuentim të lartë të njerëzve”, tha Metaj.
“Do të bëjmë një inspektim të jashtëzakonshëm në aspektin e masave të mbrojtjes nga zjarri duke i kërkuar të gjitha pjesët tjera nga legjislacioni që e kemi”, tha Lajqi.
Inspektimet, të rregullta dhe të jashtëzakonshme, për synim kanë krijimin e kushteve për siguri të qytetarëve dhe të pronës. Ndërsa inspektimet e tilla e të ngjashme do të realizohen gjithandej vendit për krijimin e kushteve të sigurisë, u tha me këtë rast.
