Policia e Kosovës-Njësia e Veçantë e hetimeve me urdhër të Prokurorisë Speciale të Kosovës, të premten ka kryer bastisje në Ministrinë e Industrisë, Ndërmarrësisë dhe Tregtisë (MINT), si dhe në një shtëpi, dy banesa e në një restorant.
Në raportin 24 orësh të Policisë së Kosovës bëhet e ditur se pas bastisjeve janë arrestuar tre persona dhe pas intervistimit me vendim të prokurorit janë dërguar në mbajtje.
Tutje në raport bëhet e ditur se rasti është cilësuar “Keqpërdorim i pozitës apo autoritetit zyrtar”.
“Me datë 18.08.2023 është zbatuar urdhëresa e datës 17.08.2023 e Gjykatës Themelore në Prishtinë–Departamenti Special për kontrollim, ku janë kontrolluar një shtëpi, dy banesa, një lokal afarist dhe dy zyra. Lidhur me rastin tre të dyshuar meshkuj kosovarë janë arrestuar dhe pas intervistimit me vendim të prokurorit janë dërguar në mbajtje”, thuhet në raport.
Ndryshe, pas këtyre bastisjeve janë arrestuar dy zyrtarë të MINT-it, drejtori i Departamentit për Rezervat Shtetërore të Mallrave, Hafiz Gara, dhe drejtori i Departamentit për Integrim Evropian dhe Koordinim të Politikave, ish-sekretarin Irfan Lipovica.
Po ashtu është arrestuar edhe Ridvan Muharremi, person që u raportua i afërt me kryeministrin Albin Kurti.
Dy zyrtarët e MINT-it akuzohen për keqpërdorim të detyrës zyrtare, ndërsa i arrestuari i tretë dyshohet për “dhënie të ndihmës në kryerjen e veprës penale të Keqpërdorimit të detyrës zyrtare”.
Gjatë bastisjes bëhet e ditur se janë siguruar dhe sekuestruar prova materiale të cilat do të përdoren për procedurë të mëtutjeshme hetimore.
Të njëjtit me urdhër të Prokurorit të Shtetit janë në mbajtje për 48 orë.
