Ku ndodhet 3-vjeçari që u “rrëmbye” nga gjyshërit e tij nga ana e babait, të cilët refuzojnë t’ia kthejnë fëmijën të ëmës? Policia ende nuk ka një përgjigje.
Babai i vogëlushit humbi jetën në një aksident rrugor rreth 1 vit më parë. Pas arrestimit të gjyshit të të miturit, 60-vjeçarit Rexhep Gjuni, është ndaluar nga policia edhe një person tjetër, 49-vjeçari me iniciale A. S., banues në Has.
49-vjeçari i ndaluar nga uniformat blu është vëllai i gjyshes së 3-vjeçarit. Ndërsa vijojnë kërkimet për gjetjen e gjyshes, 57-vjeçares me iniciale B. Gj, banuese në Durrës dhe vëllait tjetër të saj, 43-vjeçarit me iniciale F. S., banues në Has.
Policia ka kryer kontrolle në disa banesa të të afërmve të gjyshes së 3-vjeçarit, në Kukës dhe në Has, ku kishte indicie se mund të mbahej i mituri, por i mituri ende nuk është gjetur.
Rexhep e Shyqyrie Selaj, babain dhe nënën e Bahrije Gjunit, gjyshes që akuzohet se ka larguar nipin 3 vjeç nga e ëma dhe që është në kërkim nga policia e quajnë veprim të papjekur dhe i kërkojnë ta dorëzojë fëmijën. Ata tregojnë se Bahrija kishte shkuar në banesën e tyre në Has pikërisht më 13 prill. Atë natë kishin fjetur aty.
Të nesërmen kur Shyqyrie ishte kthyer nga kullotja e bagëtive nuk e kishte gjetur në banesë. Bahrija ishte larguar me fëmijën.
