Për gjurmë të sulmit terrorist po kërkohet edhe këtu në kodrën e Zveçanit, në lagjen “Lugina e Diellit”.
Posa arrijnë në destinacion, në terren zbarkojnë hetuesit e të tjerët përkujdesen për perimetrin e sigurisë.
Si zakonisht prapa auto-kolonës, e të fundit në terrenin e bastisjes arrijnë pjesëtarët e EULEX-it, që në vazhdimësi kanë shoqëruar Policinë e Kosovës në bastisjet që ndërlidhen me sulmit terrorist në Basnjskë.
Në asistencë të pranishëm janë edhe njësitet për neutralizimin e ekspozivëve, por të cilët nuk patën nevojë për ndërhyrje.
Për më shumë se një orë hetuesit qëndruan në katin e fundit të ndërtesës.
Forcat speciale u larguan me të përfunduar bastisja, Nuk dihen rezultatet e bastisjes por një gjë është e sigurt, në katin e sipërm ka jetuar një person i përfshirë direkt në sulmin terrorist në Banjskë.
Ka edhe dëshmi të tjera që tregojnë banesa numër 9 i përket Vladimir Toliqit. Një fletpagesë për shërbime të internetit përkon me muajin shtator të vitit 2023.
Toliq i cili të paktën një banesëe e ka në “Luginën e diellit”, ka qenë i armatosur bashkë me grupin terrorist në Banjskë, ku u plagos nga Policia e Kosovës.
Pas arrestimit, i njëjti u dërgua për mjekim në QKUK, ndërsa tash ndodhet në paraburgim nën dyshimet për vepra kundër rendit kushtetues dhe terrorizmit.
Bastisja në banesën e të dyshuarit për terrorizëm nuk ishte e vetmja.
Gjithashtu edhe buzë lumit Ibër në afërsi të “Tre Rrokaqiejve”, Policia ka kryer bastisje.
Këtu me gjasë pronari, identitetit i të cilit dhe lidhja me sulmin nuk është kuptuar, nuk ishte i pranishëm, për çka dera e hyrjes është hapur me forcë.
“Duke marrë parasysh që ne jemi vetëm në asistencë të njësitit kundër terrorizmit në Prishtinë, unë mund të konfirmoj vetëm bastisjet për arsye se ato i di. Çka është konfiskuar është punë e hetuesve me fol për këtë, por edhe nuk di”, ka deklaruar Veton Elshani, Zëvendësdrejtor i Policisë – Rajoni i Veriut.
Policia e Kosovës, në vazhdimësi ka kryer bastisje në zona të ndryshme në veri të vendit, të ndërlidhura me hetimin për organizimin dhe të përfshirët në sulmin terrorist në Banjskë.
