Argjentina Hoxhaj e ftuar në emisionin e mëngjesit ”Alarm”, në ATV ka folur rreth librit të saj të botuar së fundi “Nga shtatzënia deri në lindje”, që kryesisht përmban këshilla dhe informacione, për gratë shtatzëna.
Ajo tha se ky libër është i ndarë në dy kapituj; në pjesën e parë flitet për shtatzëninë, derisa në pjesën e dytë jepen informacione rreth lindjes.
“Duke e parë se sa e rëndësishme është që secila grua shtatzënë të ketë informacione rreth shtatzënisë, gjendjes emocionale e psikologjike të nënës, ndryshimet për të cilat kalon etj., atëherë unë e kam sjell këtë libër. Fillimisht kam bërë hulumtime rreth temave që i kam përzgjedhur, e pastaj kam vazhduar për teknikat dhe metodat e ndryshme që ndihmojnë gruan në procesin e lindjes, e për të cilin kam bërë thuajse një vit përgatitje që ky libër të botohet. Përveç këshillave dhe informacioneve të përgjithshme për shtatzëninë, në këtë libër ka edhe të dhëna rreth marrëdhënieve në çift, për çka mendoj se ndihmon shumë sepse kuptohet, që ka ndryshime në çift pas lindjes së fëmijës së parë”, tha ajo.
Tutje, ajo përmendi se është në përgatitje të librit të dytë, që kryesisht do të ketë informacione rreth zhvillimit të hershëm të fëmijës./atvlive.tv./
Për më shumë ndiqni videon e mëposhtme:
