Aktualisht shteti i Republikës së Kosovës nuk ka asnjë kontratë lobimi në Shtetet e Bashkuara të Amerikës. Kjo është hera e parë që ndodhë një gjë e tillë që nga viti 1992. Kosova mbeti pa asnjë kontratë lobimi pikërisht pak para se te vijë në pushtet presidenti aktual, Donald Trump.
Përderisa Kosova po stagnon në këtë drejtim, Serbia nuk po qëndron ‘duarthatë’. Tani për tani institucionet shtetërore të Serbisë kanë pesë kontrata lobimi aktive në SHBA, duke luftuar kështu fuqishëm Kosovën në qendrën kryesore te vendimmarrjes në botë.
E kjo sipas analistëve dhe njohëseve të zhvillimeve politike, përbën një rrezik serioz për shtetin e Kosovës.
Sipas tyre, lobimi në SHBA dhe në qendrat kryesore të botës, duhet të jetë një nga prioritetet kryesore të qeverisë së re në Kosovë, e cila pritet të formohet pas zgjedhjeve të 9 shkurtit.
Fokusi te Kongresi i SHBA-së
Ish-deputeti i Lidhjes Demokratike të Kosovës, njëherit aktivist shumë vjeçar i çështjes kombëtare në SHBA, Faton Bislimi, për gazetën “Bota sot” thotë se Serbia e ka shtuar aktivitetin e saj lobist në SHBA, sidomos pas ardhjes së Trump si president.
Faton Bislimi
“Ka vite tanimë që unë kam ekspozuar prezencën e shtuar lobiste të Serbisë në Uashington, sidomos nga koha kur atje ambasador i tyre ishte Gjuriq. Por, siç duket tani me ardhjen në pushtet të administratës Trump, Serbia ka shtuar angazhimin lobist edhe më shumë. Vlerësoj se sforcimi i marrëdhënieve të Kosovës me SHBA-të doemos duhet të jetë prioritet kyç i qeverisë së re të Kosovës. Ne kemi faktet historike dhe argumentet pro-perëndimore në anën tonë, andaj na duhet vetëm angazhim i urtë por i mençur karshi Ëashingtonit”, shprehet Bislimi.
Sipas tij, fokusi kryesor i Kosovës duhet të jetë tek Kongresi i SHBA-vë, aty ku vendoset edhe politika e jashtme amerikane.
“Formula jonë e suksesit më përfitimin e përkrahjes amerikane ka qenë, është dhe do mbetet e suksesshme–çelësi është Kongresi i SHBA-ve. Fokusi ynë duhet të jetë aty, ngase pikërisht aty gatuhet politika e jashtme amerikane. E kuptoj mirë idenë se disi neve duhet të arrijmë përkrahjen apo ndikimin tek Presidenti Trump direkt, apo njerëzit e afërt të tij, dhe normalisht se kjo do ishte e mirëseardhur. Mirëpo, nëse duam diçka të qëndrueshme, atëherë ne përkrahjen duhet ta fitojmë tek liderët kyç të politikës së jashtme amerikane në Kongres. Na duhet shumë punë e angazhim, por rezultati do jetë shumë më domethënës dhe më i qëndrueshëm. Fatmirësisht, ne kemi zëra të fuqishëm në Kongres që besojnë në aleancën unike në mes të SHBA-ve dhe Kosovës, dhe kjo narrativë duhet ruajtur si sytë e ballit”, deklaron Bislimi.
Më tej, ai thotë se arma kryesore e Serbisë në SHBA vazhdon të jetë propaganda.
“Serbia e din fare mirë se krejt çka ka në dorë është propaganda dhe fondet e panumërta që jep për të instaluar këtë propagandë si të besueshme në Ëashington. Tash, mund ta merrni me mend se sa më shumë fonde duhet hargjuar për të tentuar të instalosh propagandën si të vërtetë, kundrejt fondeve që duhen për të shpërfaqur të vërtetën. Ne i kemi faktet historike dhe argumentet siç e thash, prandaj, veç duhet urtë e mençur t’i shpërfaqim ato aty ku duhet–në Kongresin e SHBA-ve edhe tek Administrata Trump”, shpjegon Bislimi për “Bota sot”.
“Është fatkeqësi në vete që ne ende po merremi me procesin e finalizimit të zgjedhjeve të 9 shkurtit. Çdo ditë e humbur për një qeverisje efektive të vendit, i jep vakuum më të madh Serbisë për instalim të propagandës së saj. Klasa jonë politike duhet ta kuptojë se roli i saj është në shërbim të vendit e jo anasjelltas. Me çka po shohim deri tash, egot e atyre që llogariten liderë politikë po dalin të jenë më të mëdha se interesi i vendit. Verdikti i popullit është i qartë nga zgjedhjet e 9 shkurtit. Implementimi i tij është obligim i secilit në politikë”, thekson Bislimi.
“Përtej çdo interesi personal apo partiak, parimi i vetëm që sot nuk duhet thyer është parimi i të qenurit në shërbim të vendit. Askush nuk mund t’i shërbejë vendit nëse para këtij parimi vendos çfarëdo ideje të çfarëdo parimi tjetër politik. Kosova është e bekuar me partneritetin me SHBA-të dhe kushdo që veç mund të mendojë se ndoshta mundemi edhe pa ShBA e veç me Evropën, e ka gabim, dhe duhet t’i shfletojë edhe njëherë faqet e historisë së kombit tonë, veçanërisht karshi Evropës”, përfundon për “Bota sot”, ish-deputeti i Lidhjes Demokratike të Kosovës, njëherit aktivist shumë vjeçar i çështjes kombëtare në SHBA, Faton Bislimi.
Qëllimi i Serbisë
Skënder Zogaj
Kurse, analisti Skënder Zogaj, për “Bota sot” thotë se tani më shumë se kurrë Kosovës i duhet një lobim i fuqishëm, pasi bota ka hyrë në një krizë të re të konflikteve.
“Çështja e lobimit është njëra nga detyrat kryesore të çdo vendi e çdo populli për të krijuar miqësi dhe partneritete me të gjitha vendet e botës, e sidomos për ato vende që kanë rol të rëndësishëm në strategjinë e sigurisë mbrojtëse, sepse njerëzimi, tashmë ka hy në krizën e re të konflikteve dhe, rreziku është permanent kudo, dhe shumë rrezikues për vendet e “vetmuara” e të pafuqishme për t’u vetëmbrojtur! Tipike e këtillë është Kosova, vendi më i ri që pas shekujsh robërie, me intervenim ushtarak të shteteve mike ka arritur të çlirohet dhe të shpallet shtet i lirë dhe i pavarur!”, deklaron Zogaj.
Ai thotë se Serbia po tenton me çdo kush që ta dobësojë miqësinë shqiptaro-amerikane, miqësi që e me shumë mund e punë ë ndërtoi presidenti historik, Ibrahim Rugova.
“Kjo dihet saktë, se e ka arritur në saje të punës kolosale diplomatike të Presidentit dr. Ibrahim Rugova, i cili, përmes punës së palodhshme lobuese ka arritur të krijojë miqësi dhe partneritete me vendet më të fuqishme të BE dhe SHBA, dhe e ka nxjerrë vendin nga robëria! Serbia e di mirë rolin e superfuqive, prandaj, iu ka rrekur lobimit në BE e në SHBA, për ta dobësuar miqësinë shqiptaro amerikane, që t’i rikthej pozicionet e saja të interesit në Kosovë, ku siç dihet është duke u përpjekur ta mbajë peng një pjesë të territorit!”, thekson Zogaj.
“Përpjekjet lobuese të Serbisë po shihet se janë shtuar në SHBA, por nuk besoj se mund ta dominojnë pozicionin e Kosovës, e cila është e ngulitur në axhendat kryesore politike, diplomatike dhe ushtarako strategjike, për të cilat ka bërë investime të mëdha dhe nuk mund të heq dorë! Mirëpo, nëse Kosova nuk tregohet e vëmendshme dhe aktive në realizimin e objektivave të përbashkëta, mund të ketë devijime, zbehje të raporteve dhe kjo, është me pasoja!”, shprehet Zogaj.
Për fund, Zogaj nënvizon se Kosova duhet t’i kushtojë kujdes të shtuar lobimit në SHBA, tani kur shteti jonë nuk ka asnjë kontratë lobimi.
“Kosova nuk mendoj se nuk qëndron keq në ruajtjen e partneritetit por, padyshim se duhet t’i kushtoj kujdes edhe më shumë, forcimit të zyrave diplomatike me kuadro të zgjedhura profesionale dhe të bashkërenditjes së veprimtarive me komunitetin shqiptar në Amerikë, që është shumë i fortë dhe tashmë ka një ndërgjegjësim të lartë për t’i dal zot çështjeve kombëtare! Serbia nuk besoj se mund ta konkurroje lobimin e shqiptarëve”, përfundon analisti Skënder Zogaj për “Bota sot”.
