![](https://i0.wp.com/www.fiks.al/wp-content/uploads/2023/09/dalin-pamjet-i-paprekshmi-i-prizrenit-shoqerohej-me-ish-shefin-e-antidroges-e-hetues_64f6b4063a718.jpeg?resize=850%2C445&ssl=1)
I paprekshmi i Prizrenit, Shkodran Pulaj, i cili përfundoi dje në prangat e Policisë së Kosovës pas një aksioni të zhvilluar në lagjen “Bajram Curri” njihet goxha shumë për shoqërimin e tij me zyrtarë policorë. Miqësia e tij siç duket e ka shpëtuar deri tash nga arrestimi e hetimi për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Lexuesit kanë bërë me dije se Pulaj, i cili ka qenë kandidat i Aleancës për Ardhmërinë e Kosovës për asambleist në Prizren, njihet si person që ka pasur krahun e fortë dhe asnjëherë nuk është prekur nga organet e rendit.
Veprimtaria e tij nuk është ndalur, teksa shoqërimi i tij me ish shefin e Antidrogës, Enver Bujari, në kohën sa ai mbante këtë pozitë ka vazhduar e madje edhe është bërë publike.
Ai shoqërohej me ish-shefin e Antidrogës e hetues
Por jo vetëm me të parin e Njësisë së Antidrogës, Shkodran Pulaj ka pasur takime të shpeshta edhe me hetuesin policor të Hetimeve Rajonale, Metë Kastrati.
Pulaj dhe tre të dyshuarit e tjetër janë arrestuar nga Njësia e Antidrogës, me ç’rast tashmë pritet të ndërmerren veprimet e tjera të nevojshme.
Gjatë këtij aksioni, Policia ka sekuestruar një sasi të substancave narkotike, si dhe armë e municion, që do të shfrytëzohen si prova lidhur me rastin.