![](https://i0.wp.com/www.fiks.al/wp-content/uploads/2023/12/detaje-nga-plagosja-ne-gjakove-ish-dhendri-e-gjuajti-me-arme-zjarri-ne-kembe-viktimen-del-fotoja-e-tij_658fc22c99bbd.jpeg?resize=850%2C694&ssl=1)
Nga gjuajtjet me kallashnikov dje në rrugën “Yll Morina” tek salloni i bukurisë “Almira Nails” në komunën e Gjakovës, mbeti i plagosur i riu Jetmir Ukëhaxhaj. Siç mësohet, viktima pas ngjarjes ka pranuar tretman mjekësor në spitalin rajonal “Isa Grezda”.
Media merr vesh nga burimet e veta se viktima është plagosur në këmbën e majtë dhe është jashtë rrezikut për jetë.
Policia e Kosovës teksa konfirmoi rastin gjithashtu bëri të ditur se i dyshuari u largua nga vendi i ngjarjes me ç’rast Policia është vënë në kërkim të tij.
Ndërsa, siç mësohet, i dyshuar për plagosjen e Ukëhaxhajt, i cili është ende në kërkim të Policisë së Kosovës është Kushtrim Beqa, ish-dhëndri i viktimës.
Deri më tani nuk dihen arsyet që çuan dyshen në këtë konflikt ku u përdor edhe arma e zjarrit.
Rastin e ka konfirmuar zëdhënësi i Policisë për rajonin e Gjakovës, Sheremet Elezaj i cili tha se “policia është duke punuar për të sqaruar të gjitha rrethanat që kanë të bëjnë rastin si dhe kapjen e të dyshuarit”.
“Rreth orës 18:20 kemi pranuar informatë se një person mashkull i moshës madhore ishte qëlluar më armë zjarri në rrugën “Yll Morina” në Gjakovë. Policia menjëherë ka dalë në vendin e ngjarjes, përderisa viktima është dërguar në Spitalin Rajonal në Gjakovë. Nga informatat e para të pranuara nga personeli mjekësor, viktima është jashtë rrezikut për jetë”, tha Elezaj.