Të premten e 12 prillit, i gjithë vendi u trondit nga një ngjarje që ndodhi në Qendrën për Punë Sociale në Ferizaj.
Në njërën nga zyrat e këtij institucioni, Valon Aliu dyshohet se vrau me armë zjarri ish-gruan e tij, Erona Cokli dhe plagosi në krah vëllain e saj, të mitur.
36-vjeçari dhe 21-vjeçarja kanë një fëmijë të përbashkët. Ata ishin ndarë 10 muaj më parë dhe ishin në proces të ndarjes së kujdestarisë së fëmijës.
Ditën kur ndodhi vrasja, Valoni kishte shkuar në Qendrën për Punë Sociale që ta merrte djalin e tij. Pas disa orësh ishte kthyer në këtë institucion bashkë me djalin. Dhe pastaj kishte shtënë me armë zjarri në drejtim të ish-bashkëshortes së tij, duke e lënë të vdekur në vendngjarje dhe duke e plagosur vëllain e saj.
Valon Aliut të shtunën Gjykata Themelore në Ferizaj ia caktoi masën e paraburgimit prej një muaj për vrasjen e ish-bashkëshortes dhe plagosjes e vëllait të saj, të mitur.
Ai po dyshohet për vrasje të rëndë dhe për armëmbajtje pa leje.
Sipas gjykatës, Valon Aliu e goditi disa herë me armë zjarri në kokë ish-bashkëshorten e tij dhe shtiu në drejtim të vëllait të saj të miturit me iniciale D.C., duke e plagosur në krah.
Para trupit gjykues, Valon Aliu deklaroi se pas kryerjes së këtij akti, ka tentuar që të bëjë vetëvrasje, por nuk i kishin mbetur më plumba në karikator.
Valon Aliu ishte emër i njohur për Policinë dhe organet e drejtësisë. Nga Gjykata Themelore në Ferizaj kanë thënë se në vitin 2008 ai kishte qenë i akuzuar për lëndim të lehtë trupor, rast për të cilin gjykata ia kishte shqiptuar masën edukative – mbikëqyrje e shtuar nga ana e prindit, raporton Kiks Kosova.
Shtatë vjet më vonë, më 5 mars të 2015-ës, Valon Aliu përfundoi sërish në gjykatë, si i akuzuar për lëndim të rëndë trupor. Ani pse Kodi Penal i Republikës së Kosovës parasheh që dënimi për këtë vepër të fillojë nga 6 muaj deri në 10 vjet burgim, në këtë rast, gjykata e dënoi Valoni vetëm me një gjobë prej 1 mijë e 350 eurove.
Nuk shkoi gjatë e Valoni ra sërish ndesh me ligjin. Në vitin 2019, ai u ul sërish në bankën e të akuzuarve për shkak të veprës penale “Blerja, pranimi ose fshehja e sendeve të përfituara me kryerjen e veprës penale”. Më 13 shkurt të 2019-ës, gjykata e dënoi atë me 2 muaj burgim me kusht.
Në vitin 2021, Valon Aliu u akuzua edhe për nxitje të akteve seksuale me premtim të rrejshëm për martesë, mirëpo Gjykata mori aktgjykim refuzues, pasi që Prokuroria Themelore në Pejë ishte tërhequr nga ndjekja penale.
E një vit më vonë, më 2022-ën, ai u akuzua për kanosje, rast për të cilin Gjykata e dënoi me 6 muaj burgim me kusht. Ky aktgjykim u bë u plotfuqishëm më 14 nëntor të 2022-ës, përmes të cilit u vendos se ai nuk do e vuaj këtë dënim, në rast se brenda dy viteve nuk kryen ndonjë vepër tjetër penale.
Ai momentalisht po mbahet në paraburgim, masë e cila iu caktua të shtunën e 13 prillit të 2024-ës, si i dyshuar për veprat penale “Vrasje e rëndë” dhe “Mbajtje në pronësi, kontroll ose posedim i paautorizuar i armëve”.
