Ish-inspektori i Agjencisë së Inteligjencës së Kosovës, Shkëlqen Sopjani, mendon se ndonëse ekziston rreziku që edhe në Kosovë të eskalojë situata, një gjë e tillë më shumë mund të ndodhë një Bosnje dhe Hercegovinë.
“Është e qartë që rreziku për eskalim të situatës në rajon është Bosnja, me theks të veçantë Republika Srpska, dhe këtë e pamë me disa veprime të ditëve të fundit që ndërmorën atje nga vetë Dodiku i cili me çdo kusht po tenton që ta ndajë republika Srpskan dhe ta minojë pra kushtetueshmërinë dhe rregullimin momental shtetëror që e ka Bosnja dhe Hercegovina, dhe krejt këtë për arsye nëse mundem me thanë, arsyet janë krejt personale mirëpo po i kamuflon si arsye nacionale marrë parasysh se i njëjti veç është dënuar prej shkallës së parë atje me një vit burgim dhe gjashtë vjet mosushtrim të ndonjë funksioni publik”, ka thënë Sopjani në Info Magazine të Klan Kosovës.
“Edhe pa këtë zhvillim ka pasë tensione dhe gjithmonë ka pasë pasiguri në Bosnje”.
Sipas Sopjanit, Kosova është më pak e rrezikuar për shkak të homogjenitetit të saj.
“Njëjtë është edhe në Kosovë, mirëpo në Kosovë nuk është situate aq serioze sa kishte me qenë në Bosnje pasi që në Kosovë kemi një rregullim krejt ndryshe por edhe një homogjenitet shumë ma të madh në popullatën e Republikës së Kosovës, pasi që, përjashto këtë pjesën veriore, i kemi do të thotë, shumicë absolute është popullata serbe por jo edhe aq numra të mëdhenj, por në pjesë të tjera të Republikës së Kosovës është goxha problem me ndërmarrë diçka”.
