Ministri i Punëve të Jashtme të Serbisë, Marko Gjuriq, ka reaguar ndaj deklaratave të fundit të Albin Kurtit lidhur me situatën aktuale në Kosovë.
“Serbia është në shënjestër të një fushate propagandistike të koordinuar nga regjimi i Kurtit, i cili ka shfrytëzuar në mënyrë të paskrupullt sulmin ndaj kanalit ujitës — pavarësisht mungesës së plotë të provave për përfshirjen e Serbisë — si një justifikim për të minuar rrugën e Serbisë drejt BE-së, për të kërkuar dislokimin e Forcave të Sigurisë së Kosovës (FSK) në veri të Kosovës dhe për të frikësuar serbët e mbetur në Kosovë,” deklaroi Gjuriqi.
Ai shtoi se akti fizik i sabotimit mund të ketë pasur si objektiv një kanal uji, por qëllimi i vërtetë ishte Serbia dhe e ardhmja e saj evropiane. “Veprimet dhe spekulimet e shumta të Kurtit, Sveçlës dhe bashkëpunëtorëve të tij tregojnë qartë se synimi i tyre është dëmtimi i Serbisë dhe përparimit të saj evropian,” theksoi Gjuriqi.
Ministri serb u bëri thirrje institucioneve ndërkombëtare që të ndihmojnë në hetime dhe të publikojnë të gjitha informacionet e disponueshme për autorët e sulmit.
Gjuriqi gjithashtu akuzoi regjimin e Kurtit për përfshirje të mundshme në organizimin e sulmit, duke thënë se “taktikat e tij tregojnë një përpjekje të qëllimshme për të zhvendosur fajin dhe për të ndjekur një agjendë të rrezikshme që synon thellimin e përçarjeve, zhdukjen e pranisë serbe dhe konsolidimin e kontrollit me pretekste të rreme.”
Ai kujtoi edhe provokimet dhe destabilizimet e vazhdueshme të Kurtit, duke përmendur vendosjen e Forcave të Sigurisë së Kosovës në veri nën maskën e një varrimi, arrestimet e serbëve dhe shkeljen e Marrëveshjes së Brukselit. Gjuriqi tha se këto veprime janë pjesë e një fushate të qëllimshme për të penguar rrugën e Serbisë drejt BE-së dhe për të destabilizuar rajonin.
“Gënjeshtrat e Kurtit nuk do të kenë sukses — paqja dhe e ardhmja evropiane e rajonit do të mbizotërojnë,” përfundoi Gjuriqi.
Shënim: Ky artikull është përkthim dhe përshtatje nga gazeta serbe “Novosti” dhe nuk reflekton qëndrimet e gazetës sonë. Për më tepër, vlen të theksohet se disa pjesë të opozitës në Kosovë kanë shprehur qëndrime të ngjashme me ato të Gjuriqit, duke krijuar një dinamikë interesante në këtë debat politik.
