Është urdhëruar lirimi i 75 vilave të konfiskuara nga shteti në Brezovicë.
Gjykata e ka hedhur poshtë kërkesën e prokurorit Rasim Maloku për caktim të masës së sigurisë për pronat e sekuestruara.
Kërkesa për sigurimin e përkohshëm të pasurisë së sekuestruar është refuzuar shkaku i gabimit të prokurorit të rastit. Ai ka paraqitur kërkesë të pasafatshme për sigurimin e pronave të konfiskuara.
Urdhri i Gjykatës Themelore në Pejë
Paparaci e ka siguruar urdhrin e Gjykatës Themelore në Pejë, ku po trajtohet kjo çështje penale ndaj ish-kryetarit të Komunës së Shtërpcës, Bratislav Nikoliq dhe pesë të tjerëve.
“Hudhet si e pas afatshme kërkesa e Prokurorisë Themelore në Ferizaj për masë të përkohshme për sigurimin e pasurisë së sekuestruar”, thuhet në urdhrin e gjykatës.
75 vila në Brezovicë, Zonën e Dytë të Parkut Kombëtar “Sharri”, ishin konfiskuar në nëntor të vitit të kaluar me urdhër të Gjykatës Themelore në Pejë.
Megjithatë, Prokuroria priti rreth gjashtë muaj për të parashtruar kërkesë të re për masë të sigurisë për pronat e sekuestruara, ndonëse ligji parasheh afat prej 60 ditësh për paraqitje të kërkesës në gjykatë.
“Ligji i cili ka qenë në fuqi në kohën e sekuestrimit të përkohshëm të objekteve të cekur më lartë, ka paraparë ‘brenda gjashtëdhjetë ditëve nga konfiskimi i ndërtesës, pasurisë së paluajtshme, pasurisë së luajtshme, prokurori i shtetit kërkon masë të përkohshme për sigurimin e pasurisë’”, thuhet në arsyetimin e urdhrit të gjykatës.
“Gjykata Themelore në Pejë gjeti se kërkesa e Prokurorisë Themelore në Ferizaj për masë të përkohshme për sigurimin e pasurisë së sekuestruar, është e pasafatshme”, thuhet tutje në arsyetim të dispozitivit.
Lista e plotë e pronarëve të 75 vilave të konfiskuara në nëntor të vitit të kaluar
Lista e plotë e pronarëve të 75 vilave të konfiskuara në nëntor të vitit të kaluar
Paparaci ka siguruar listën e plotë të pronarëve të 75 vilave të konfiskuara në nëntor të vitit të kaluar, dhe të liruara me urdhër të gjykatës të mërkurën.
Politikanë, biznesmenë dhe figura të tjera publike janë pronarë të vilave, subjekte të një hetimi penal të Prokurorisë së Ferizajt në rastin e njohur si “Brezovica”. Në mesin e pronarëve është ish-ministri i Jashtëm, aktualisht deputeti i Partisë Demokratike të Kosovës, Enver Hoxhaj, biznesmeni Alban Quka, afaristi Shkëlzen Domi dhe Blerim Thaçi, vëllai i ish-presidentit Hashim Thaçi.
Rasti “Brezovica” është vlerësuar si një nga aksionet më të mëdha kundër krimit e korrupsionit në Kosovën e pasluftës. Pas dhjetëra personave të arrestuar, miliona eurove të ngrira, ishin sekuestruar mbi 70 vila.
Prokurori i rastit, Rasim Maloku pretendon se këto ndërtime janë bërë në kundërshtim me ligjin.
Në këtë çështje, prokurori Maloku ndjek penalisht ish-kryetarin e Shtërpcës, Bratislav Nikoliçin, për shkak të veprës penale “marrja e ryshfetit”, “keqpërdorimi i detyrës zyrtare” dhe “ushtrimi i ndikimit”.
Në këtë çështje, bashkë me “Braçën”, akuzohen edhe pesë persona të tjerë: Dimitrije Raiçiçeviq, Rijad Hasani, Hajrush Ajvazi, Labinot Vitija dhe Hysein Ajdini.
