Tefik Mustafa, i cili u ndalua nga autoritetet e Serbisë në Merdarë, me akuza për gjoja krime të pretenduara të luftës ndaj popullsisë jo-shqiptare, gjatë luftës në Kosovë më 1999, raportohet se iu është caktuar paraburgimi në kohëzgjatjen e 30 ditëve.
Gjykata e Lartë në Beograd ka njoftuar se gjyqtari për procedurën paraprake të asaj gjykate ka nxjerrë aktvendim me të cilin të pandehurit Tefik Mustafa, t’i caktohet masa e paraburgimit për maksimum 30 ditë, raporton Tanjug.
Në njoftim thuhet se ai po ndalohet për ekzistimin e rrethanave që tregojnë rrezik arratisjeje, si dhe për ekzistencën e rrethanave të veçanta që tregojnë se do të ndërhyjë në procedurë duke ndikuar te dëshmitarët.
Ndryshe, Ministria e Punëve të Jashtme dhe Diasporës lëshoi një komunikatë në lidhje me arrestimin e qytetarit të Kosovës nga autoritetet serbe në Merdarë.
Në komunikatë u tha se Zyra Ndërlidhëse e Kosovës në Serbi ka njoftuar misionet diplomatike të SHBA’së dhe Britanisë së Madhe dhe shteteve tjera në Beograd.
“Lidhur me këtë rast, Zyra Ndërlidhëse e Republikës së Kosovë në Serbi menjëherë i ka njoftuar misionet diplomatike të Shteteve të Bashkuara dhe Britanisë së Madhe dhe të shteteve tjera në Beograd si dhe i ka dërguar kërkesë zyrtare Zyrës Ndërlidhëse të Serbisë në Kosovë për konfirmim të arrestimit dhe për ofrimin e detajeve tjera relevante, në të cilën kërkesë është përfshirë edhe Delegacioni i Bashkimit Evropian në Serbi.”
Po ashtu, MPJD tha se do të paraqesin kërkesë zyrtare për të lejuar ambasadorin Jashari ta vizitojë të arrestuarin.
“Gjithashtu do tё paraqesim kёrkesё zyrtare autoriteteve serbe pёr tё lejuar Ambasadorin Jashari ta vizitojё z. Tefik Mustafa, nё mёnyrё qё shteti dhe Qeveria e Republikёs sё Kosovёs tё njoftohet mё konkretisht pёr trajtimin qё po i bёhet z. Mustafa nga organet serbe.”
Ministria e Punëve të Jashtme dhe Diasporës “ka dënuar ashpër ndalimin, arrestimin dhe keqtrajtimin e qytetarëve të Republikës së Kosovës dhe njëkohësisht i bën thirrje Bashkësisë Ndërkombëtare që të ndërmarrë hapa konkret për lirimin e menjëhershëm të qytetarit z. Tefik Mustafa dhe njëkohësisht të kërkojë përgjegjësi nga shteti serb për këto veprime arbitrare dhe destruktive dhe që bien ndesh me konventat ndërkombëtare për të drejtat e njeriut”.
MPJD shtoi se lidhur me këtë i ka njoftuar dhe shtetet e QUINT-it në Kosovë.
“Njëkohësisht ftojmë të gjithë qytetarët që mund të ballafaqohen me vështirësi të natyrave të ndryshme gjatë udhëtimit të tyre nëpër Serbi, që të na kontaktojnë në numrin e telefonit: +383 46 51 00 51.”
