![](https://i0.wp.com/www.fiks.al/wp-content/uploads/2023/06/kercenohet-nenkryetarja-e-leposaviqit-ndalohet-nje-person_647f0da495fc1.jpeg?resize=850%2C482&ssl=1)
Një person me inicialet B.D., është ndaluar të martën e gjashtë qershorit pasi i njëjti dyshohet se e ka kanosur nënkryetaren e Leposaviqit, Dragana Miletiq.
Miletiq, kishte raportuar në Polici se është kërcënuar.
Ajo kishte kërkuar mbrojtje nga Policia e Kosovës ndërsa ende nuk është hapur rast pasi që Miletiq rastin sapo e ka raportuar.
Dragana Miletiq është zgjedhur nënkryetare e Asamblesë Komunale në Leposaviq.
Kryetari i ri i komunës së Leposaviqit, Lulzim Hetemi të enjten e 25 majit ka bërë betimin në fshatin Bistricë, në objektin e shkollës fillore “Kadri Bistrica”.
Prej 29 majit, serbët lokalë të komunat veriore – Zveçan, Leposaviq dhe Zubin Potok – janë duke protestuar për të kundërshtuar hyrjen e kryetarëve të rinj shqiptarë në ndërtesat komunale.
Më 29 maj, situata është përshkallëzuar në Zveçan, pas përplasjes së protestuesve serbë me pjesëtarë të KFOR-it.
Për pasojë janë plagosur 30 pjesëtarë të forcës paqeruajtës dhe 52 serbë.
Vetë shefi i NATO-s, Jens Stoltenberg, e ka dënuar rëndë dhunën ndaj pjesëtarëve të KFOR-it.
Dhuna e ka nxitur NATO-n që të angazhojë 700 trupa shtesë në Kosovë, përveç 4.000 trupave që veçse janë në këtë shtet.
Faktori ndërkombëtar ka bërë thirrje të vazhdueshme për marrjen e hapave drejt uljes së tensioneve.
Në mesin e kërkesave janë tërheqja e kryetarëve nga ndërtesat komunale dhe pezullimi i operacioneve policore në ato ndërtesa në veri.
Disa diplomatë kanë kërkuar edhe mbajtjen e zgjedhjeve të reja në veri.