Doarsa Kica-Xhelili, deputete nga radhët e Lidhjes Demokratike të Kosovës, është deklaruar lidhur me veprimet e Lëvizjes Vetëvendosje, pasi që anëtarët e saj gjatë ditës së djeshme ndaluan deputetët e Listës Serbe që të nënshkruhen në Kuvendin e Kosovës për të mos ju humbur mandati.
Kica-Xhelili ka reaguar ashpër duke thënë se ku ishte VV-ja, gjashtë muaj më parë ku deputetët e Listës Serbe e bënë të njëjtën gjë.
Deputetja e LDK-së gjithashtu iu ka reaguar VV-së pasi që këta të fundit në orët e vona të natës mbrëmë kanë kërkuar mbajtjen e seancës në Kuvendin e Kosovës.
Kica-Xhelili ka thënë se VV-së i ka faj bota që shtetin e shohin si trampolinë mashtrimi, hajnie e manipulimi.
Postimi i plotë:
DY SKENARET E MESNATËS
Para 6 muajsh, salla plenare e Kuvendit nuk funksiononte për shkaqe “teknike”. Mbledhjet, si për zorr, mbaheshin në një sallë që nuk plotësonte asnjë kusht.
Pikërisht ato ditë, Kuvendi me mbështetje të gjithë VV, caktoi një seancë në atë sallë të vogël – ku Lista Serbe u nënshkrua që të mos e humbiste mandatin. Asnjë fjalë. Asnjë reagim. Asnjë skenar. E gjithë VV, bashkë e bëri këtë të mundur. Në atë sallë që nuk përmbushte asnjë kusht.
Por dje, ishte ditë tjetër. Ditë e bukur për aktrim. Ditë e besimit të VV që ky popull vërtetë s’merr vesh gjë. Derisa TË NJËJTIT deputetë të Listës Serbe që u nënshkruan para 6 muajsh, dje u ballafaquan me shtirrjen e VV se kësaj radhe, po i ballafaqojnë me “guxim”. Ku ishte ky guxim para 6 muajsh?
U mbyll perdja e parë!
Akti i dytë ishte kur VV shpërfaqi urinë nepotiste. Shpërfaqi shpërdorimin e Kuvendit, përçmimin e demokracisë dhe.. thënë butë, neverinë ndaj gjithçkaje njerëzore.
Paturpësisht krenarë që në orët e natës shkelnin Rregulloren e Kuvendit, për të kontrabanduar e kaluar dhjetëra ligje, caktuar mbledhje një pas tjetrës, deputetët që duhej të ishin përfaqësues të popullit, u shndërruan në marioneta të mesnatës.
Jo pse kishin bindje, sepse s’kanë. Por, ishin urdhëruar të shkelnin Rregulloren, pa kurrfarë baze, veç sepse munden, teksa krejt këtë përçudnim e shfrytëzonin për të emëruar familjarë në borde. E pastaj, luteshin për pak zhurmë që populli të mos kuptonte çka po bëjnë.
U mbyll dhe perdja e dytë.
Nuk i mjaftuan dy akte, dhe u mobilizuan i madh e i vogël që fajin për prezencën e Listës Serbe, t’ia linin, disi, atyre që nuk ishin fare në sallë.
Si me GJITHÇKA tjetër, këtyra bota i ka faj. I ka faj bota që shtetin e shohin si trampolinë mashtrimi, hajnie e manipulimi. I ka bota faj që skenaret s’po ju shiten më. Prandaj shpifin, çjerren, e brohorasin të pavërteta të cilave përfundojnë duke iu besuar vet.
E mëkatin e bartë pa faj Kosova. Kjo që s’i pat kujt faj që nuk e njohën, nuk e deshën, e tani ia zhvasin demokracinë nga të gjitha shtyllat e saj sepse e shohin veten mbi të.
Pastaj befasohen pse në Kosovë s’po ju beson më kush.
