Një person është vënë nën hetim nga policia pasi kishte zaptuar plazhin e njohur si “Pasqyrat” në Sarandë.
Gjatë operacionit policia ka sekuestruar 20 çadra dhe 40 shezlongë, të vendosura nga shtetasi F. M., pa lejen e bashkisë Sarandë.
Materialet hetimore u referuan pranë Gjykatës së Shkallës së Parë të Juridiksionit të Përgjithshëm Sarandë.
Njoftimi i policisë
Kishte zaptuar plazhin “Pasqyrat” pa lejen e bashkisë, nën hetim një person në Sarandë. Sekuestrohen çadra dhe shezlongë
Nis operacioni policor i koduar “Plazh i lirë”, me qëllim lirimin e hapësirave publike në plazhe.
Operacioni, nga Komisariati i Policisë Sarandë, Policia Bashkiake dhe Autoriteti Kombëtar i Bregdetit.
Operacioni do të shtrihet në të gjithë vijën bregdetare të rrethit Sarandë.
Gjatë kontrolleve të para të kryera në nisje të këtij operacioni, në plazhin e quajtur “Pasqyrat”, është konstatuar një rast i pushtimit të hapësirës publike, për ta shfrytëzuar në mënyrë të kundërligjshme, me qëllim përfitimin.
Në vijim të veprimeve procedurale për këtë rast, janë sekuestruar 20 çadra dhe 40 shezlongë, të vendosura nga shtetasi F. M., pa lejen e bashkisë Sarandë.
Gjithashtu, iu referuan materialet procedurale Prokurorisë pranë Gjykatës së Shkallës së Parë të Juridiksionit të Përgjithshëm Sarandë, ku nisi procedimi në gjendje të lirë për shtetasin F. M., për veprat penale “Pushtimi i tokës” dhe “Mospagimi i taksave dhe i tatimeve”.
Operacioni “Plazh i lirë”, vijon.
Policia e Shtetit apelon për të gjithë operatorët ekonomikë që operojnë në vijën bregdetare, që të zbatojnë ligjin, të mos pushtojnë në mënyrë të kundërligjshme sipërfaqe plazhi me qëllim përfitimin, si dhe të mos kryejnë ndotje akustike. Në këtë kuadër ftojmë qytetarët që të denoncojnë në numrin pa pagesë 112, çdo rast të paligjshmërive.
