Opozita u shpreh aq e gatshme për zgjedhje parlamentare sa që prezantoi edhe koalicionet e kandidatët e tyre për kryeministër.
Madje, dukej se kishte filluar edhe fushatën zgjedhore, pasi takimet e tyre me qytetarë kishin marrë hovin. Po ashtu edhe kritikat ndaj pushtetit aktual ishin shtuar.
Mirëpo, kërkesa dhe dëshira e tyre për zgjedhje duket se është zbehur. Ka kohë që ҫështja e zgjedhjeve nuk po përmendet më.
A u frikësua opozita nga gatishmëria e pozitës për zgjedhje dhe a po dëshmohet se kërkesa e opozitës ishte vetëm retorike pa diçka konkrete
Lidhur me këtë ҫështje, për ‘Bota sot’ kanë folur njohës të ngjarjeve politike.
Kështu, njohësja e zhvillimeve politike, Magbule Shkodra në një prononcim ka thënë se, ka dy mënyra për të shkuar në zgjedhje, mirëpo opozita nuk i ka numrat për të bërë asnjërën.
Shkodra: Qeveria Kurti e zgjedhur me 51% te votave, nuk pranon të rrëzohet
Magbule Shkodra
“E keni parasysh se mënyra për të shkuar në zgjedhje, do të thotë që ka mundësi të shkohet përmes rrëzimit të qeverisë apo përmes shpërndarjes së parlamentit. Opozita nuk i ka numrat për të bërë asnjërën. Pra, për të shkuar në zgjedhje, nevojitet edhe vullneti i pozitës, gjë që po shihet se tanimë nuk ekziston”, vlerëson ajo.
Sipas analistes Shkodra, edhe qeveria Kurti e zgjedhur me 51% te votave, nuk pranon të rrëzohet dhe as deputetët e pozitës nuk ia krijojnë mundësinë opozitës të shpërbëhet parlamenti.
“Dhe e keni parasysh se kjo qeveri që është zgjedhur me 51%, në asnjë mënyrë nuk do të pranoj të shkoj në zgjedhje, pra që të rrëzohet qeveria apo të shkarkohet qeveria, por të vetmin opsion që ndoshta mund ta pranonin do të ishte shpërndarja e parlamentit e për tu bërë kjo, atëherë nevojiten pra edhe votat e deputetëve të pozitës”, thekson ajo.
Gjithashtu, ajo thotë se edhe opozita nuk ishte unike në atë që kërkonin zgjedhje të reja.
“Po ashtu opozita është treguar që nuk është unike edhe në mënyrën se si kërkonin të shkonin në zgjedhje, ato fillimisht mes vete nuk kishin një darkordim, njëra parti kërkonte që të bëhet shkarkimi i qeverisë, ndërsa këto dy të tjerat pajtoheshin me shpërndarjen e parlamentit. Sidoqoftë për të shkuar në zgjedhje nevojiten numrat, opozita nuk i ka numrat dhe përderisa nuk i ka numrat, nuk ka çfarë të bëjë”, tha analistë Shkodra për ‘Bota sot’.
Tutje ajo thotë se opozita nuk u frikësua nga zgjedhjet e reja, mirëpo nuk kanë numrat dhe kanë mbetur në mëshirën e deputetëve të pozitës.
“Nuk besoj se mund të thuhet se opozita e kishte vetëm çështje retorike apo u frikësua, është shumë e thjeshtë, nuk i kanë numrat. Kështu që kur nuk i kanë numrat nuk kanë çfarë të bëjnë, janë në mëshirën e deputetëve të pozitës, të vetë gatishmërisë që qeveria Kurti kur të jetë e gatshme dhe ajo do të pres një momentum më të volitshëm për vete dhe atëherë do të shkoj në zgjedhje”, tha ajo.
Analistja Shkodra sqaron tutje se nëse zgjedhjet nuk mbahen deri në shtator, më tutje konsiderohen si zgjedhje të rregullta.
“Por nëse deri në shtator nuk shkohet në zgjedhje, prej tetorit e tutje, zgjedhjet do të konsiderohen si zgjedhje normale siҫ do të duhej të mbaheshin në kalendarin elektoral”, tha ajo.
Mehmeti: Edhe me i lut Albini, nuk hyjnë në zgjedhje të parakohshme
Faton Mehmeti
Ndërkaq, analisti Faton Mehmeti, thotë se, kërkesa e opozitës për zgjedhje nuk ka qenë serioze, madje ata frikësohen edhe nga zgjedhjet e rregullta që po vijnë.
“Kërkesa e opozitës nuk ka qenë serioze, edhe vet nuk i kanë besuar. Është bërë sa për sy e faqe, me thanë se po bëjmë diçka. Edhe me i lut Albini se nuk hyjnë në zgjedhje të parakohshme, ata po tremben se po afrohen ato të rregulltat”, vlerëson ai.
Tutje, Mehmeti thotë se Kosova asnjëherë nuk ka pasur opozitë më të dobët dhe kjo është arsyeja pse mund të fitoj sërish Lëvizja Vetëvendosje.
“Kjo opozitë është kaq e dobët, kaq mediokre sa s’ka ku shkon më shumë. Nuk besoj se Kosova ka pasur opozitë më të dobët ndonjëherë, kjo edhe është arsyeja që fiton VV bindshëm, jo se janë më të mirët, por tjerët janë shumë të dobët. Në këtë kuptim, vlerësoj se kërkesa për zgjedhje kurrë s’ka qenë serioze dhe si e tillë ka ngelur në sirtar”, thekson ai.
