Ads: Merr BB VIP Falas me Premium 12 Mujore

Lajme

KQZ publikon raportet financiare të partive politike për vitin 2022

 
   

Komisioni Qendror i Zgjedhjeve publikoi, në ueb faqe, raportet vjetore financiare pas përfundimit të procesit të auditimit nga auditorë, të cilët janë përzgjedhur nëpërmjet një konkursi të hapur publik nga Zyra për Regjistrim, Certifkim dhe Kontrollin Financiar të Subjekteve Politike.

Raportet e audituara financiare të vitit 2022, të cilat u takojnë partive politike, janë publikuar në ueb faqen e KQZ-së: Shërbimet e KQZ-së > Shërbimet për Subjekte Politike > Raportet Vjetore Financiare, ose në vegzën direkte: https://kqz- ks.org/sherbime-per-subjektet-politike/raportet-vjetore-financiare-te-audituara/, thuhet në njoftimin e  KQZ-së.

Me këtë publikim, KQZ, thotë se e përmbyllë procesin e publikimit të raporteve vjetore financiare të partive politike për vitet 2021 dhe 2022 si dhe të raporteve financiare të deklarimit financiar të fushatës së Zgjedhjeve për Kuvendin e Kosovës (14 shkurt 2021) dhe Zgjedhjeve Lokale për Kuvende Komunale dhe dy raundet për Kryetarë të Komunave (17 tetor 2021 dhe 5 nëntor 2021).

Më 13 nëntor, KQZ ka publikuar raportet e audituara financiare të vitit 2021, të cilat u takojnë partive politike dhe raportet e audituara të deklarimit financiar të fushatës së proceseve zgjedhore që janë mbajtur gjatë vitit 2021.

“Duke u mbështetur në legjislacionin në fuqi, të gjitha partitë politike të regjistruara janë të obliguara që deri më 1 mars të çdo viti të dorëzojnë raportet vjetore financiare, ndërsa pas çdo palë zgjedhjeje subjektet politike garuese duhet të dorëzojnë raportin financiar të fushatës më së largu deri 45 ditë pas ditës së zgjedhjeve”, thuhet në këtë raport.

KQZ thotë se me qëllim të rritjes së transparencës, prej disa vitesh ka publikuar raportet vjetore financiare dhe raportet e fushatave zgjedhore edhe kur ato nuk kanë qenë të audituara, duke sqaruar se të njëjtat mund të pësojnë ndryshime dhe saktësi gjatë procesit të auditimit.