Deputeti i Lëvizjes Vetëvendosje, Hydajet Hyseni, e ka fajësuar pandeminë për vonesë të procedurave të deklarimit të pasurisë. Hyseni u dënua vitin e kaluar nga gjykata me 500 euro për mos-deklarim të pasurisë.
Gazeta ka kontaktuar me Hysenin, i cili ka thënë se s’ka dashur ta bëjë të madhe si çështje dënimin e tij, teksa e ka quajtur “të padrejtë” dhe “të pabazë” vendimin e gjykatës.
“Ka qenë thjesht një keqkuptim edhe një ngatërrim në dorëzimin e deklaratës së cilës unë e kam deklaruar në vazhdimësi. Prandaj, s’ka pasë bash asnjë bazë. Por, meqë ka qenë ligj e kam zbatuar si të tillë dhe e kam paguar. Ka pasë vetëm pse s’janë deklaruar me kohë, i kam edhe komunikimet kur i kam dorëzuar, por nuk e di pse janë ngatërruar dhe s’kam dashtë as ta bëjë çështje… Kjo ka ndodh në kohën e COVID-it kur edhe ata s’kanë punuar edhe ne i kemi pasë të vështira mënyrat e komunikimit”, ka deklaruar ai ndër të tjera.
“Betimi për Drejtësi” ka raportuar se dënimi i Hysenit për mos-raportim të pasurisë ishte marrë më 7 nëntor 2022, derisa aktakuza ishte ngritur më 7 tetor të po të njëjtit vit.
Në arsyetimin e aktgjykimit ndaj Hysenit, thuhet se ai në cilësinë e zyrtarit të lartë publik, deputet në Kuvendin e Republikës së Kosovës, nuk e ka bërë deklarimin e pasurisë brenda afatit ligjor në Agjencinë për Parandalimin e Korrupsionit me rastin e marrjes se detyrës së deputetit.
Tutje, thuhet se deputeti Hyseni nuk e ka bërë deklarimin e pasurisë brenda afatit prej 30 ditësh edhe pse ka qenë i njoftuar me kohë nga ana e zyrtares kontraktuese në Kuvendin e Republikës së Kosovës për ta bërë deklarimin e pasurisë me rastin e marrjes së detyrës.
Në vendim thuhet se gjykata më 7 tetor 2022, ka pranuar nga Prokuroria Themelore në Prishtinë aktakuzën ndaj Hysenit për veprën penale “Mos raportim ose raportim i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare” së bashku me shkresat e lëndës.
Andaj, gjykata duke u bazuar në këto prova, kishte vërtetuar se veprimet e Hysenit përbënin vepër penale të mosraportimit të pasurisë, duke shpallur edhe aktgjykimin dënues.
