Gjatë raportimit në Komisionin për Shëndetësi dhe Mirëqenie Sociale, kryetari i Bordit të Shërbimit Klinik Universitar të Kosovës, Naim Bardiqi, tha se janë duke i adresuar të gjitha problemet me të cilat janë duke u përballur klinikat në QKUK.
Sipas Bardiqit, lista e gjatë e pritjes vazhdon të jetë një nga problemet më të mëdha, me të cilën tash e sa vjet po ballafaqohen pacientët.
“Rëndësi të veçantë i kemi dhënë adresimit të rekomandimeve që kanë dalë nga raporti i auditimit për pasqyrat vjetore financiare të SHSKUK-së. Jemi duke bërë maksimum aty ku ka mundësi në eliminimin e listave të pritjes. Do të jemi në funksion të arritjes së planit të punës të menaxhmentit të SHSKUK-së, kemi në fokus harmonizimin e aktiviteteve të SHSKUK-së me MSH-në dhe me ministritë e tjera të linjës për projekte infrastrukturore”, tha Bardiqi.
Përkundër vështirësive, drejtori i ri i SHSKUK-së, Elvir Azizi, i cili e mori këtë pozitë vetëm pak ditë më parë, u zotua se do të bëjë çmos që të rregullohet niveli i shërbimeve mjekësore.
“Gjatë kësaj periudhe kam bërë disa vizita për t’u njohur me infrastrukturë dhe kam vërejtë funksionimin. Sfidat janë furnizimi i barnave dhe materialeve shpenzuese, mungon dokumenti i brendshëm, nuk ka udhërrëfyes klinik e kështu më radhë. Infrastruktura është e vjetërsuar dhe jemi vonë me digjitalizimin. Misioni im rrjedh nga vizioni dhe me arritjen e këtij misioni do të merremi me disa drejtime kryesisht me listën e shërbimeve shëndetësore”, tha Azizi.
Por ish-ministri i Shëndetësisë, Armend Zemaj, thotë se Qeveria ka gisht në përzgjedhjen e sekretarit Bardiqi në krye të bordit të SHSKUK-së.
“Janë 30 muaj të kësaj Qeverie dhe është drejtori i katërt i SHSKUK-së. E kemi parë një dëshirë të flaktë të kësaj Qeverie për një kontroll të plotë dhe kjo u bë me zgjedhjen e një sekretari në krye të bordit. Esenciale është mungesa e barnave dhe kjo është fatkeqësi me folë kur është proklamuar për rritje të buxhetit. Si do ta adresoni sepse të mos ketë antibiotik është papërgjegjësi dhe e dyta është lista esenciale”, tha Zemaj.
Më tej, anëtarët e komisionit kanë shprehur shqetësimet e tyre edhe për gjendjen e rënduar infrastrukturore nëpër spitalet rajonale. Nën menaxhimin e Shërbimit Spitalor Klinik Universitar të Kosovës janë 37 klinikat e Qendrës Klinike Universitare të Kosovës dhe shtatë spitale rajonale. /atvlive.tv
Edicionin Qendror të lajmeve në ATV e gjeni në videon më poshtë:
