Presidenti i Këshillit Europian, Charles Michel, i ka dërguar ftesën shteteve anëtare të BE-së për takimin e nesërm, duke i informuar me temat kryesore që do të diskutojnë.
“Dëshiroj t’ju ftoj në takimin tonë të Këshillit Europian të tetorit në Bruksel, që do të fillojë në orën 15:00 të enjten më 26 tetor, si dhe në takimin tonë të Euro Samitit të nesërmen”, thuhet në hyrje të ftesës.
Fillimisht, Michel foli për luftën në Lindjen e Mesme dhe mbështetjen e BE-së ndaj Izraelit, por tha se kjo luftë s’do ta shpërqendrojë Unionin nga lufta në Ukrainë.
“Takimi ynë vjen në një kohë paqëndrueshmërie dhe pasigurie të madhe globale, të përkeqësuar së fundmi nga zhvillimet në Lindjen e Mesme. Këto zhvillime kërkojnë vëmendjen tonë të menjëhershme, pa na shpërqendruar nga mbështetja jonë e vazhdueshme për Ukrainën. Përgjegjësia jonë është të mbetemi të bashkuar dhe koherent dhe të veprojmë në përputhje me vlerat tona të sanksionuara në Traktatet. Situata në Lindjen e Mesme është një tragjedi. Ne shprehëm qëndrimin tonë të përbashkët në deklaratën tonë të 15 tetorit. Në takimin tonë pres që ne të dënojmë edhe një herë në termat më të ashpër të mundshëm sulmet terroriste brutale dhe pa dallim të Hamasit kundër Izraelit dhe të njohim të drejtën e Izraelit për të mbrojtur veten, në përputhje me të drejtën ndërkombëtare dhe të drejtën ndërkombëtare humanitare. Ne gjithashtu do të ripërsërisim thirrjen tonë për lirimin e menjëhershëm dhe pa kushte të të gjithë pengjeve”.
Më pas, Michel tha se shtetet anëtare do të merren edhe me temat tjera shqetësuese ku përmendi dialogun Kosovë-Serbi.
“Ne do të mbulojmë gjithashtu çështje të tjera shqetësuese të politikës së jashtme – duke përfshirë situatën në Sahel, marrëdhëniet Prishtinë-Beograd dhe Kaukazin e Jugut”, thuhet në ftesë.
Po ashtu, Michel tha se do të flasin edhe për “temën e rëndësishme të migracionit, duke vlerësuar hapat e ndërmarrë që nga diskutimi ynë i fundit në Granada”.
“Në Samitin e Euros, do të na bashkohen presidentët e Bankës Qendrore Europiane dhe të Eurogrupit për të diskutuar situatën ekonomike dhe financiare, si dhe vazhdimin e koordinimit dhe qeverisjes së ngushtë të politikave tona makroekonomike. Ne do të shqyrtojmë gjithashtu progresin e arritur në Unionin tonë të Tregjeve të Kapitalit dhe Unionin Bankar, si dhe punën e nisur për një euro dixhitale”, tha Michel.
“Mezi pres t’ju shoh për atë që shpresoj se do të jetë një takim shumë i frytshëm”, përfundon letra.
